2019 jyl Qazaqstan úshin óte mańyzdy boldy – Qasym-Jomart Toqaev
NUR-SULTAN. QazAqparat – «Biz Tuńǵysh Prezıdentimiz negizin qalaǵan damýdyń strategııalyq baǵdarynan aınymaımyz». Memleket basshysy Qasym-Jomart Toqaev Qazaqstanda akkredıttelgen shet elderdiń dıplomatııalyq mıssııalarynyń basshylarymen kezdesýde osylaı aıtty, dep habarlaıdy QazAqparat.
«Qurmetti joǵary mártebeli Elshiler jáne Ókildik basshylary! Hanymdar men myrzalar!Búgin ózderińizben júzdesip otyrǵanyma qýanyshtymyn. Elimizdegi dıplomatııalyq korpýs ókilderimen kezdesý jaqsy dástúrge aınaldy. Bul, eń aldymen, ekijaqty jáne kópjaqty yntymaqtastyqty odan ári nyǵaıtatyn mańyzdy shara. Sondyqtan, osy basqosýda Qazaqstannyń damý baǵdaryna, ishki-syrtqy saıası basymdyqtaryna basa mán bergimiz keledi. Qazirgi tańda Nur-Sultan qalasynda 70 elshilik jáne 30 halyqaralyq uıym ókildigi bar. Elimizdegi dıplomatııalyq ókildikter aldaǵy ýaqytta da kóbeıe túsedi dep úmittenemiz» dep bastady sózi Memleket basshysy.
Odan ári Prezıdent Elbasynyń tarıhı sheshim qabyldaǵanyn, bıliktiń beıbit jolmen berilýi Qazaqstandy tyń serpinmen damytýǵa múmkindik týdyrǵanyn atap ótti.
«2019 jyl Qazaqstan úshin óte mańyzdy bolǵanyn barshańyz jaqsy bilesizder. Tuńǵysh Prezıdentimiz – Elbasy Nursultan Ábishuly Nazarbaev bılikke basshylardyń jańa býyny kelýi úshin tarıhı sheshim qabyldady. Ótken prezıdent saılaýy saıası júıemizdiń turaqtylyǵyn jáne demokratııalyq damý jolymyzdyń myzǵymastyǵyn búkil álemge tanytty. Meniń atyma quttyqtaý joldaǵan memleket basshylaryna jáne halyqaralyq uıymdardyń jetekshilerine rızashylyǵymdy bildiremin. Bıliktiń beıbit jolmen berilýi Qazaqstandy tyń serpinmen damytýǵa múmkindik týdyrdy. Biz Tuńǵysh Prezıdentimiz negizin qalaǵan damýdyń strategııalyq baǵdarynan aınymaı, sabaqtastyq, ádilettilik, órleý qundylyqtaryna berik bolamyz», - dedi Qasym-Jomart Toqaev.
