2019 jyldan beri Qazaqstan ekonomıkasy 15,5% naqty ósim kórsetti

BÝRABAI. KAZINFORM – 2019 jyldan beri Qazaqstan ekonomıkasynyń naqty ósimi 15,5% boldy. Bul týraly Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda aıtty.

− Bul aralyqta elimizdiń ishki jalpy ónimi 288 mıllıard dollarǵa jetti, al jan basyna shaqqandaǵy ishki jalpy ónim 46% jýyq artyp, 14 myń dollardan asty. Syrtqy saýda aınalymy 45% jýyq ósip, 140 mıllıard dollar boldy. Negizgi kapıtalǵa salynatyn ınvestıtsııa 1,5 esege ulǵaıdy. Byltyr onyń kólemi 19 trıllıon teńgeden asty, − dedi Qasym-Jomart Toqaev.

Al ınvestıtsııa bilim-ǵylym salasyna 5 eseden astam, kólik salasyna 3 esege jýyq, densaýlyq saqtaý jáne áleýmettik qyzmet kórsetý salasyna 3,5 ese kóp salynǵan.

− Osy ýaqytta 500-den astam mektep boı kóterdi. Kóptegen densaýlyq saqtaý, sport jáne basqa da áleýmettik nysandar ashyldy. 4400 shaqyrymǵa jýyq avtokólik joldary salyndy jáne jóndeldi. Jańa temir jol jelileri paıdalanýǵa berildi. Ondaǵan óndiris orny iske qosyldy, − dep tolyqtyrdy Memleket basshysy.

Buǵan deıin Prezıdent «Jaıly mektep» qurylysy máz emestigin, taıaý arada ózi tekserý júrgizetinin aıtqan edi.