2019 jyldan beri ekonomıkamyz 30 paıyzǵa jýyq ósti – Prezıdent
ASTANA. KAZINFORM - Memleket basshysy Qasym-Jomart Toqaev Respýblıka kúnine arnalǵan saltanatty jıynda sóılegen sózinde el Konstıtýtsııasy túbegeıli ózgeristerdiń jańa kezeńine jol ashqanyn atap ótti.
Sonyń nátıjesinde memlekettik bılik júıesi tolyǵymen jańǵyrdy. Bir palataly Quryltaı paıda boldy. Osylaısha, biz «Kúshti Prezıdent – yqpaldy Parlament, ıaǵnı Quryltaı – esep beretin Úkimet» tujyrymdamasyn naqty iske asyrdyq.
Vıtse-Prezıdent ınstıtýty quryldy. Qaýipsizdik Keńesiniń qurylymyna qajetti ózgerister engizildi. Elimizdiń joǵary konsýltatıvtik mekemesi – Qazaqstan Halyq Keńesi óz jumysyn bastady.
Elimiz dúnıe júzinde eriktiler, ıaǵnı volonterler qozǵalysyna konstıtýtsııalyq mártebe bergen sanaýly memlekettiń biri atandy.
-Barshańyzǵa belgili, qazirgi dúnıe júzinde, osyndaı kúrdeli, turaqsyz, boljamsyz, bulyńǵyr zamanda bılik júıesinde mundaı aýqymdy ózgeris múlde joq. Bul – memleketimiz úshin alǵa qaraı úlken saıası qadam,-dedi Qasym-Jomart Toqaev.
Sondaı-aq Prezıdent sózinde qoǵamnyń barlyq salasyn qamtyǵan reformalar elimizdiń damýyna tyń serpin bergenin atap ótti.
2019 jyldan beri ekonomıkamyz 30 paıyzǵa jýyq ósti. Jan basyna shaqqanda ishki jalpy ónim kólemi 15 myń dollardan asty.
«Ulttyq qor – balalarǵa» jobasy aıasynda 7 mıllıon balanyń esepshotyna 2,5 mıllıard dollar qarjy aýdaryldy.
Byltyr 20 mıllıonnan astam sharshy metr turǵyn úı salyndy. Bul – buryn-sońdy bolmaǵan kórsetkish.
Azamattardyń ortasha ómir súrý uzaqtyǵy 76 jasqa jaqyndady. Dúnıejúzilik banktiń málimetine sáıkes, Qazaqstan bul kórsetkish boıynsha bizdiń aımaqta kósh bastap tur.
Biz ulttyq ekonomıkanyń áleýetin kúsheıtýge basymdyq berip, basa nazar aýdaryp otyrmyz. Álemdegi eń yqpaldy elderdiń qataryna qosylyp, 34-orynda turmyz.
-Elimizdiń jalpy ishki ónim kólemi 350 mıllıard dollarǵa jetip kele jatyr. Bul – Táýelsiz Memleketter Dostastyǵy sheńberindegi ekinshi oryn degen sóz. Shaǵyn jáne orta bıznestiń jalpy ishki ónimdegi úlesi aıtarlyqtaı artty, ıaǵnı 40 paıyzǵa jetti. Kásipkerlerimiz otandyq taýar óndirisin ulǵaıtyp, jańa iskerlik mádenıeti qalyptasýda. Búginde osy salada elimizdegi eńbekke jaramdy azamattardyń jartysyna jýyǵy jumys istep júr,-dedi Qasym-Jomart Toqaev.
Osyǵan deıin Memleket basshysy Qazaqstan memleket tarıhynyń mereıli mejesine álem qaýymdastyǵynyń qurmetine ıe bolǵan el retinde jetip otyrǵanyn aıtqan bolaty.
