2019-2021 jyldary «Jastar tájirıbesi» jobasy 30 myń jasty qamtıdy

NUR-SULTAN. QazAqparat - 2019-2021 jyldary «Jastar tájirıbesi» jobasymen 30 myń jas qamtylady. Bul týraly búgin Májilistegi Úkimet saǵatynda QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Qazaqstandaǵy áleýmettik lıftilerdiń tıimdiligin arttyrýdyń mańyzdy tetikteriniń biri – bul «Jastar tájirıbesi» jobasy. Ol jumys izdeýshi jastarǵa qajetti tájirıbe alýǵa jáne áleýetti jumys berýshimen baılanys ornatýǵa kómektesedi. Jobanyń mehanızmi óte qarapaıym: JOO túlegi eńbek bırjasynda jumyssyz retinde tirkeledi. Al jumyspen qamtý bólimderi olardy naqty beıindegi mamandar qajet etetin kompanııalar men memlekettik organdarmen baılanystyrady. Mundaı tájirıbeden ótýshige bıýdjet esebinen 6 aı boıyna 60 myń teńgeden astam mólsherde qarajat tólenedi. Bul óte jaqsy tájirıbe», - dedi ol.

Mınıstrdiń aıtýynsha, 2019-2021 jyldary jobaǵa qatysýshylar sanyn 30 myńǵa deıin ulǵaıtý kózdelgen.

«Postkeńestik aýmaqta bul – teńdesi joq joba. Buǵan uqsas tájirıbe tek Eýroodaq elderinde bar. Sonymen qatar, «Dıplommen – aýylǵa» baǵdarlamasy boıynsha mamandarǵa beriletin birjolǵy járdemaqy kólemi 70-ten 100 aılyq eseptik kórsetkishke deıin ulǵaıtyldy. Budan basqa, 3 mıllıon 700 myń teńgege deıin turǵyn úı satyp alýǵa bıýdjettik kredıtter berý qarastyrylǵan», - D.Abaev.