2018 jyly Transkaspıı halyqaralyq baǵdarymen 1,3 mln tonna júk tasymaldanady
ASTANA. QazAqparat - Jyl aıaǵyna deıin Transkaspıı halyqaralyq kólik baǵdarymen 1,3 mıllıon tonna júk tasymaldaý josparlanyp otyr, dep málim etti «Qazaqstan temirjoly» UK» AQ basshysy Qanat Alpysbaev.
«Bıylǵy jyly THKB aýmaǵynda tasymal kólemin 725 myń tonnaǵa jetkizý josparlanǵan bolatyn. Qazirdiń ózinde júk tasymaly bir mıllıon tonnaǵa jetti. Jyl qorytyndysy boıynsha 1,3 mıllıon tonnany jetýi yqtımal». - dedi ol sársenbide Bakýde ótken «Transkaspıı halyqaralyq kólik baǵdary (THKB) halyqaralyq qaýymdastyǵynyń» ZTB músheleriniń jalpy jınalysynda.
Q. Alpysbaev jınalǵandardy Baký- Tbılısı-Kars temirjol baǵdarynyń ashylýymen quttyqtady, dep habarlaıdy «Qazaqstan temir joly» UK» AQ baspasóz qyzmeti.
«Jańa temirjol baǵdaryn ashý - bul tarıhı oqıǵa. Bizge osy baǵdardyń ınfraqurylymyn jaqsartyp, dálizdiń ótkizý áleýetin kóterip, qosymsha júkter tartýdy belsendi júrgizýimiz kerek»,-deıdi «Transkaspıı halyqaralyq kólik baǵdary» Halyqaralyq qaýymdastyǵy» ZTQ Birlestik basqarmasynyń tóraǵasy «Qazaqstan temirjoly» UK» AQ basshysy Qanat Alpysbaev.
«Biz kelesi jyly Transkaspıı baǵdarymen qazaqstandyq kómir, hımııalyq, taý-ken ónimderin tasymaldaý, konteınerlik tasymaldy damytýdy josparlap otyrmyz. 2018 jyly THKB baǵdarymen 3 mıllıon tonna júk tasymaldaý josparymyzda bar».
Kelesi jyly THKB baǵdarymen munaı, gaz ǵana emes, qazaqstandyq astyqty Ázirbaıjan, Grýzııa, Túrkııaǵa shyǵarýdy josparlap otyr.
QTJ basshysynyń aıtýynsha, kópjaqty kelisilgen tasymaldaýshylardyń yntymaqty qyzmeti halyqaralyq baǵdardaǵy tasymaldyń osy qarqynmen jalǵasyn tabatyn bolady. Sondyqtan onda básekege sáıkes keletin mólsherleme belgilegen jón.
«Transkaspıı halyqaralyq kólik baǵdary (THKB) halyqaralyq qaýymdastyǵynyń» ZTB músheleriniń jalpy jınalysyna «Ázirbaıjan temir joly» JAQ tóraǵasy D. Gýrbanov, «Grýzın temir joly» basshysynyń orynbasary A. Nıkolashvılı, «Túrik temir jolynyń» Júk tasymaldaý jónindegi bas dırektory V. Kýrt, Aqtaý halyqaralyq teńiz saýda portynyń basshysy A. Túrikpenbaev, «Ázirbaıjan Kaspıı teńizi keme qozǵalysy» JAQ basshysy R. Velıev, Baký halyqaralyq teńiz portynyń dırektory T. Zııadov, Batýmı teńiz portynyń bas dırektorynyń orynbasary I. Muqatov qatysty.
Jalpy jınalys otyrysynda Qaýymdastyqtyń 2017 jyly atqarǵan qyzmetiniń aldyn ala qorytyndysy qaraldy. Sondaı-aq, 2018 jylǵy THKB baǵdaryndaǵy tarıftik mólsherleme bekitildi.
Sonymen qatar Baký- Tbılısı - Kars jańa temirjol jelisindegi júk tasymalynyń tarıftik mólsherlemesi qaralyp, bekitildi. Qaýymdastyqtyń 2018 jylǵa arnalǵan sharalarynyń jospary men bıýdjeti bekitildi.
Qaýymdastyqtyń jalpy jınalysynyń sheshimimen onyń quramyna «Quryq porty» JShS (Qazaqstan) kompanııasy, Lianyungang Port Holdings Group (QHR) qaýymdastyrylǵan múshesi bolyp qabyldandy.
