2018 jyly sybaılas jemqorlyqqa qarsy qyzmettiń 5 ókili sottaldy
ASTANA. QazAqparat - 2018 jyly Qazaqstanda sybaılas jemqorlyqqa qarsy kúres qyzmetiniń 5 qyzmetkeri qylmystyq jaýapqa tartylǵan, dep habarlaıdy QazAqparat tilshisi Memlekettik qyzmet isteri jáne sybaılas jemqorlyqqa qarsy kúres agenttigine silteme jasap.
«2018 jyly paraqorlyq qylmysyna qatysty 7 adam qylmystyq jaýapqa tartyldy. Olardyń ishindegi 5 qyzmetker sybaılas jemqorlyqqa qarsy qyzmet ókilderi bolsa, bireýi Qaraǵandy oblysy boıynsha memlekettik qyzmet departamentiniń jáne taǵy biri Memlekettik basqarý akademııasy fılıalynyń qyzmetkeri. Qazirgi ýaqytta 7 ofıtserge qatysty sotqa deıingi tergeý amaldary júrgizilip jatyr», - delingen agenttiktiń habarlamasynda.
Sotqa deıingi tergeý amaldaryn toqtatý úshin kásipkerden 1 mıllıon teńge bolatyn parany talap etken Mańǵystaý oblysy boıynsha Ulttyq bıýro departamentiniń asa mańyzdy isteri jónindegi ofıtseri A. ustalǵan. Ony ishki qaýipsizdik basqarmasynyń qyzmetkerleri quryqtaǵan.
Sol sekildi, qylmystyq is boıynsha zattaı dálel bolyp tabylatyn 200 myń AQSh dollary kóleminde aqshanyń urlanǵany anyqtalǵan. Ony OQO (qazirgi Túrkistan oblysy) boıynsha Ulttyq bıýronyń departamentiniń B. esimdi tergeýshisi jymqyrǵan. Jasalǵan qylmystyń aýyr bolýyna baılanysty onyń jasóspirim balalarynyń bolǵanyna qaramastan, sot ony eki aı merzimge qamaýǵa alǵan.
Qarajattyń jymqyrylýyna baılanysty atalǵan is boıynsha dál osy aımaqta jedel-tergeý tobynyń basshysy jumystan bosatylyp, tergeý basqarmasynyń bastyǵy men aımaqtyq organ basshysynyń orynbasary laýazymynan aıyrylǵan. Sonymen birge, baqylaýdy álsiretkeni úshin Ulttyq bıýronyń tergeý jáne aýmaqtyq departamentteriniń bastyqtary tártiptik jaýapqa tartylǵan.
Sol sekildi ózderine baǵynyshty qyzmetkerler paraqorlyq qylmysqa jol bergen Qostanaı oblysy boıynsha Ulttyq bıýronyń jedel basqarmasynyń bastyǵy men departament bastyǵynyń orynbasary laýazymynan aıyrylǵan. Al departament bastyǵyna eskertý jarııalanyp otyr.
