2018 jyly SQO-ǵa 3 myńnan astam adam qonys aýdarady
PETROPAVL. QazAqparat - Bıyl Soltústik Qazaqstan oblysyna 767 otbasy qonys aýdarady, dep habarlaıdy «QazAqparat» HAA tilshisi.
Jumyspen qamtýdy úılestirý jáne áleýmettik baǵdarlamalar basqarmasynyń kollegııasynda vedomstvo basshysy Sergeı ıAkovenko kvota sanynyń artqanyn málim etti. Óńirge 3,4 myńnan astam adam kóship keledi. Sonyń ishinde, 385 adamnan quralǵan 77 oralman otbasy qonys aýdarmaq.
«224 eldi meken, sonyń ishinde ekonomıkalyq ósý áleýeti joǵary 106, ortasha - 118 jáne 7 aýdan ortalyǵy anyqtalyp alyndy. Onda 828 bos turǵyn úı, 1282 bos jumys orny bar», - dedi S.ıAkovenko.
Oblys ákimi Qumar Aqsaqalov qonys aýdarýshylardyń baqsha ósirýmen nemese basqa da jumystarmen aınalysýǵa daıyn ekendigin esepke alyp, iriktep alý qajettigin atap ótti.
«Olar aldyn ala oqýy kerek. Bizge kóship kelgenderdiń azyraq bóligi ǵana osy jerde jumys istep jatyr. Biz, máselen baqsha ósiretin adamdardy tartqymyz keledi. Bizde jer de, sý resýrstary da jetkilikti. Olardy osyndaı jumystarǵa ornalastyrý kerek», - dedi Q.Aqsaqalov.
2017 jyly soltústik óńirge Almaty, Jambyl, Qyzylorda, Mańǵystaý jáne Ońtústik Qazaqstan oblystarynan 188 otbasy kóship kelgen.
