2018 jyly Ózbekstanda analogtyq telehabar taratý toqtatylady
ASTANA. QazAqparat - 2018 jyly jeltoqsan aıynda Ózbekstanda analogtyq telehabar taratý toqtatylady, dep habarlaıdy Podrobno.uz .
Eldiń Mınıstrler kabıneti osyndaı qaýly qabyldady. Analogtyq sıgnal taratýdyń toqtaýy kezeń-kezeńmen júrgiziledi, ol arnaıy kestede belgilengen. Mysaly, analogtyq sıgnal Tashkent qalasynda 2018 jyldyń 15 shildesinde óshiriledi, al respýblıka boıynsha bul shara sol jyldyń 5 jeltoqsanynda júzege asyrylady.
Ózbekstanda tsıfrlyq telehabar taratý úshin tegin telearnalardyń jıyntyǵy qalyptastyrylǵan. Qazir oǵan Ulttyq teleradıokompanııa qataryna kiretin 13 kanal qamtylǵan. Atap aıtar bolsaq «Ózbekstan», «Eshlar», «Sport», «Kınoteatr», UZ HD jáne basqalary. Sondaı-aq oǵan jekemenshik 7 telearna kiredi - Mening Yurtim, Caravan TV, UzReport TV, Zo'r TV HD, FUTBOL TV, Milliy TV, Zo'r TV.
«Analogtyq habar taratý úderisi jeńil ótýi tıis. Óıtkeni, az qamtylǵan otbasylar men zeınetkerlerge tsıfrlyq telehabar taratý sıgnalyn qabyldaý úshin qajetti qurylǵylar men teledıdar satyp alýyna bankterden jeńildetilgen nesıe beriledi», - deıdi úkimettegi aqparat berýshi sheneýnik.
Qural-jabdyqtardyń baǵasyn arzandatý úshin «Ózeltehsanoat» kompanııasyna aldaǵy bes jyl ishinde 3 mıllıon tsıfrlyq televızııalyq qabyldaǵyshtar shyǵarý júktelgen.
Eske sala ketsek, Qyrǵyzstanda bıyl 15 mamyrdan bastap analogtyq habar taratý ajyratylǵan bolatyn.
