2018 jyly mektep baǵdarlamasyna din taqyrybyndaǵy jańa oqýlyq engiziledi

  ASTANA. QazAqparat - Qazaqstandaǵy mektep oqýshylary «Qoǵam jáne din» atty jańa oqýlyqtarmen qamtylmaq. Bul týraly búgin Úkimette ótken baspasóz máslıhatynda QR Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

«Bilim jáne ǵylym mınıstrligimen birlese «Qoǵam jáne din» degen jumys ataýymen jańa oqýlyq boıynsha sharalar iske asyrylyp jatyr. Kitap mektep baǵdarlamasyna engiziletin bolady. Onda álemdik dinder men memlekettiń órkenıetine qatysty bilim berýde ǵylymı kontent kúsheıtilgen»,-dedi Ermekbaev.

Osy oraıda vedomstvo basshysy oqýlyq aldaǵy oqý jylynyń ekinshi jartysyna nemese 2018-2019 oqý jylyna ázirlenetinin atap ótti.

Sonymen qatar ol saıttardy monıtorıngileýden bólek, kitaptardy saraptamadan ótkizý jumystary júrgizilip jatqanyn sóz etti.

«2017 jyly saraptamadan 1,5 myńnan astam osyndaı nysan ótti, onyń ishinde qylmystyq-atqarý júıesindegi kitaphana qory da bar, ıaǵnı bas bostandyǵan aıyrý oryndaryndaǵy kitap qory taldaýmen qamtyldy. Aǵymdaǵy jyly bas bostandyǵynan aıyrý mekemelerinde destrýktıvti mazmundaǵy 13 kitap anyqtaldy»,-dedi mınıstr.