2018 jyly Qazaqstanda xalyqtyń eń tómengi kúnkóris deńgeıi kóteriletin bolady

Bul týraly búgin Ortalyq kommýnıkatsııalar qyzmetinde ótken brıfıngte Eńbek jáne xalyqty áleýmettik qorǵaý vıtse-mınıstri Svetlana Jaqypova málim etti, dep xabarlaıdy QazAqparat.

Vıtse-mınıstr, Elbasynyń tapsyrmasy aıasynda, 2018 jyldyń 1 qańtarynan bastap, qazaqstandyqtardyń tutyný shyǵyndarynyń naqty deńgeıin kórsetetindeı, eń tómengi kúnkóris deńgeıin esepteý ádistemesi qaıta qarastyrylatynyn aıtty. Mundaı ózgeris  shamamen 3 mln adamǵa bazalyq zeınetaqy, múgedekter, asyraýshysynan aıyrylǵan otbasylar úshin járdemaqy, ataýly kómek jáne múgedek balalardy kútýshilerdiń járdemaqy mólsherin ósirýdi qamtamasyz etpek. Bul maqsatqa bıýdjetten qosymsha 63 mıllıard teńge bólý kózdelgen.

"Qazaqstandyq tamaqtaný akademııasyn tartý arqyly mınıstrlik óz zertteýlerin júrgizdi. Negizgi ádistemeler anyqtaldy. Tıisinshe, statıstıkalyq málimetter taldandy. Bizdiń elde eń tómengi kúnkóris deńgeıi normatıvtik-statıstıkalyq ádisteme arqyly anyqtalady. Eger qazir onyń deńgeıi 24459 teńge bolsa, kelesi jyly ol 16 protsentke artyp, shamamen 28 myń teńgege deıin jetedi. Oǵan elimizdiń bıýdjetinen 63 mlrd teńge qarastyrylǵan", - dedi vıtse-mınıstr.