2018 jyly Qazaqstanda tanymal bolǵan avtokólik brendteri anyqtaldy
ASTANA. QazAqparat - 2018 jyly Qazaqstanda jańa kólikterdi satyp alýǵa 1,5 mlrd dollarǵa jýyq qarjy jumsaldy. Bul týraly «QazAvtoÓnerkásip» avtokólik salasyndaǵy kásiporyndar odaǵynan málim etti, dep habarlaıdy QazAqparat tilshisi.
«12 aıda resmı dılerler 57 919 avtokólik ótkizip, bul kórsetkish bir jyl burynǵy deńgeıden 24,9 paıyzǵa joǵary boldy. Jalpy, ótken jyly elimizdiń turǵyndary jańa jeńil kólikterdi satyp alýǵa 496,6 mlrd teńge jumsap, bul qarjy 2017 jylǵy kórsetkishten 35,8 paıyzǵa artyq boldy», - delingen habarlamada.
Atap aıtqanda, 2018 jyldyń qorytyndysy boıynsha Qazaqstanda suranysqa ıe brendterdiń alǵashqy bestiginiń kóshin Lada (13 413 kólik satyldy) bastap tur. Satylǵan kólik sany boıynsha ekinshi orynda Toyota (12 278) turaqtasa, úshinshi orynǵa Hyundai (8 721) shyqty. Sonymen qatar bul bestikke KIA (2862 kólik) men GAZ (2 650) brendteri de endi.
Belgili bolǵandaı, esepti kezeńde jeńil kólikter reıtınginde Toyota Camry (4 761 kólik satyldy), jol talǵamaıtyn Lada 4x4 (3 468) jáne Lada Granta (3 428) alǵa shyǵyp, kóbirek satyldy. Sondaı-aq bul TOP-5 modelder qataryna Lada Vesta (2955) men Hyundai Tucson (2 697) kirdi.
«Ótken jyly jeńil kólikterdi satyp alý jaǵynan Almaty (15 524 kólik satyldy), Astana (10 438), Atyraý (4 285), Shymkent (3 775), Qaraǵandy (3 575), Qostanaı (3 514), Oral (2 574), Óskemen (2 414), Aqtaý (2 328) jáne Aqtóbe (2 144) turǵyndary belsendi boldy», - dep atap ótilgen «QazAvtoÓnerkásip» málimetinde.
