2018 jyly Qazaqstanda eń kóp satylǵan kólik markalary anyqtaldy
ASTANA. QazAqparat - Bıylǵy 8 aıda resmı dılerler 36 191 kólik satty. Osy kórsetkish byltyrmen salystyrǵanda 31,8 paıyzǵa joǵary boldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde Qazaqstan turǵyndary jańa jeńil kólikterdi alýǵa 304,6 mlrd teńge jumsady. Tek tamyz aıynda 5 266 avtomobıl satyldy», - dep atap ótilgen habarlamada.
Atalǵan merzimde el aýmaǵynda ótkizilgen kólikterdiń 19 144-i ımportqa tıesili bolsa, qalǵan 17 myńy qazaqstandyq avtozaýyttardyń ónimderi.
Belgili bolǵandaı, suranysy joǵary brendterdiń reıtınginde «Lada» aldyńǵy orynǵa shyqty. Bıylǵy qańtar-tamyzda el aýmaǵynda reseılik osy markanyń 8 329-y ótkizildi. Al satylǵan Toyota modelderi 8 023 danaǵa jetti. Úshinshi orynnan 4 840 kóligi satylǵan Hyundai kórindi. Sonymen qatar, suranysqa ıe kóshbasshylardyń bestigine GAZ (1734 kólik) jáne Ravon (1727 kólik) endi.
«Jeńil kólik modelderi reıtınginde Toyota Camry (2981 kólik), Lada Granta (2429) jáne jol talǵamaıtyn Lada 4x4 (1972) kósh bastap tur. Kóp satylǵan TOP-5 modelderdiń qatarynan Hyundai Tucson (1603) men Toyota Land Cruiser Prado (1249) kórindi», - delingen «QazAvtoÓnerkásip» málimetinde.
