2018 jyly Qazaqstanda 300 elektromobıl shyǵarylady
ASTANA. QazAqparat - 2018 jyly «JAC» markaly Qazaqstanda qurastyrylǵan 300 elektromobıl tutynýshylarǵa jol tartpaq, dep habarlaıdy «QazAqparat» HAA tilshisi.
Bul týraly Astanada «Qazaqstannyń ónerkásiptik saıasaty: eńbek ónimdiligin arttyrý arqyly kásiporyndardyń básekege qabilettiligin arttyrý» atty forýmda qazaqstandyq avtoóndirýshilerdiń ókili Sergeı Mogılatov málim etti.
«Búgingi kúni kólik quraý forýmy aıasynda biz ózimizdiń strategııalyq qadamymyzdy jasaǵaly otyrmyz. Bul turǵyda seriktestiktiń arqasynda «JAC» modeldi elektromobılderdiń serııasyn Qazaqstanda shyǵarýdy josparlap otyrmyz. Onyń tusaýkeseri Qytaıda qazan aıynda ótedi. Sáıkesinshe, budan keıin Qazaqstanda sertıfıkattaý jumystary iske asyrylady. Eger elektromobılderdiń naqty osy modelin shyǵarý týraly aıtar bolsaq, alǵashqy partııa 2018 jyly shyǵarylady. Olardyń sany shamamen 300-ge jýyq bolmaq. Al aýqymdy túrde shyǵarýdy 2019 jylǵa qaraı júzege asyrýdy oılap otyrmyz», - dedi ol.
Sergeı Mogılatov atalǵan kólikterdiń baǵasy shamamen qansha bolatynyn aıta alǵan joq.
«Sertıfıkattaý jumysynyń tolyq tsıkly aıaqtalmaǵandyqtan, olardyń quny qansha bolatyny ázirge belgisiz. Sertıfıkattyń sońǵy baǵaǵa áseri bolatyny sózsiz. Aıtarym, Qazaqstanda qurastyrylǵan elektromobılderdiń baǵasy qarapaıym avtokólikterden qymbat bolmaıdy. Qansha aıtqanmen, bul endi ǵana qadam basyp kele jatqan jańa tehnologııa. Tipti qoldaǵy uıaly telefonnyń ózi de qýaty bitip qalǵan kezde sharshata bastaıtyny belgili. Elektromobıl baǵytynda bul máseleniń mańyzy kem bolmaıdy. Sondyqtan, eń aldymen tutynýshy qaı jerge baryp, qýattandyryp alamyn dep júrmeıtindeı, elektrlik ınfraqurylymdy jolǵa qoıyp alý kerek. Biz qarapaıym janar-jaǵarmaı quıý beketinde 3-5 mınýt aralyǵynda kólikke benzın quıyp alamyz. Eger elektromobılderge keler bolsaq, ol jaqta másele basqa. Biz túni boıy qýattanatyn kólikter kúni boıy júrip bere alatyndaı jaǵdaıǵa jetkize bilýimiz kerek. Sonymen birge, jaqyn bekette 10 mınýttyń ishinde qýat kózin 80 protsentke toltyryp alatyndaı bolýy tıis. Ár elektromobılde eki port bar. Birimen úıde qýattandyryp alsa, tutynýshy ekinshisin bekette qoldanatyn bolady», - deıdi Mogılatov.
