2018 jyly Qazaqstan men Ózbekstan qarym-qatynasynda qandaı ózgerister bolady
ASTANA. QazAqparat - QR-dyń Ózbekstandaǵy Tótenshe jáne Ókiletti Elshisi Erik Ótembaev UZREPORT TV arnasyna bergen suhbatynda 2018 jyly eki el arasyndaǵy qarym-qatynastan qandaı ózgeris kútetinin aıtyp berdi, dep habarlaıdy «QazAqparat» HAA tilshisi.
«2018 jyl - Ózbekstannyń Qazaqstandaǵy jyly. Bul tek mádenı oqıǵa ǵana emes, barlyq baǵyttaǵy baılanystar dep aıtýǵa bolady. Bul jyldy naqty jobalar jáne baǵdarlamalar jyly, eń bastysy ártúrli deńgeıdegi naqty birikken is-áreketter jyly dep aıtýǵa bolady», - dedi Erik Ótembaev.
Dıplomat sonymen qatar eki el arasyndaǵy baılanys 2018 jyly saıası jáne ekonomıkalyq is-sharalarǵa toly bolatynyn jetkizdi.
«Ózbekstannyń Qazaqstandaǵy jyly aıasyndaǵy jobalar jarqyn isterge toly bolatynyna senimim mol. Tipti 2017 jyly biz EKSPO ótkizgende ózbek pavılony adamdar eń kóp keletin oryn ekenin baıqadyq», - dedi Erik Ótembaev.
Dıplomattyń aıtýynsha, 2017 jyl týrızm salasy bolashaqta damytý qajet salalardyń biri ekendigin kórsetken.
«Biz yntymaqtastyqtyń jańa salalaryn talqylaǵan kezde týrızmge basymdyq berildi. Ózbekstan - tarıhy baı memleket. 2017 jyly Astana arqyly, Tashkent, Samarqand jáne Buhara arqyly týrızm salasy jańǵyra bastady. Osyǵan oraı biz «Almaty - Tashkent» arnaıy poıyzyn iske qostyq», - dedi Erik Ótembaev.
Elshiniń aıtýynsha, atalǵan poıyz týrısterge Ózbekstan qalalaryn kórýge múmkindik berdi. Osyǵan oraı eki el arasynda áýe baılanysy da jandana túsken.
