2018 jyly Kaspıı qubyry konsortsıýmynyń tarıfi ózgermeıdi

ASTANA. QazAqparat - 2018 jyly Kaspıı qubyry konsortsıýmy óz qyzmetine tarıfterdi ózgertpeıdi. Bul týraly Astanadaǵy baspasóz máslıhatynda Kaspıı qubyry konsortsıýmynyń bas dırektory Nıkolaı Gorban málim etti, dep habarlaıdy QazAqparat.

«Búginde tarıfti aýystyrý josparda joq, sonymen qatar aktsıonerler arasynda munadaı talqylaýlar júrgizilmedi», dedi N. Gorban.

Budan bólek ol atalǵan Kaspıı qubyr konsortsıýmyn keńeıtý jobasy aıaqtalyp qalǵanyn atap ótti.

«Qubyr jelesiniń ótkizý qýaty 67 mln tonnany qurap otyr jáne bul jobalyq kórsetkishke sáıkes keledi», - dep túsindirdi N. Gorban.

Budan buryn habarlanǵandaı, 2018 jyly konsortsıým óziniń qubyr júıesi arqyly 67 mln tonna munaı ótkizýdi josparlap otyr. Onyń ishinde 60 mln tonnaǵa jýyǵy Qazaqstanda óndirilse, qalǵan 7 mln tonnany reseılik óndirýshilerden alý kózdelip otyr.