2018 jyly elorda mektepterinde defıbrıllıatorlar paıda bolady
ASTANA. QazAqparat - Kelesi jyly Astana mektepterindegi medıtsınalyq pýnkterde 167 defıbrıllıator ornatylady, dep habarlaıdy elorda ákimdiginiń medıa ortalyǵy.
Qalalyq densaýlyq saqtaý basqarmasynyń basshysy Kamaljan Nadyrovtyń aıtýynsha, 2018 jyly elordalyq bilim mekemelerine 167 qural alynady. Astana respýblıka boıynsha birinshi bolyp mektepterge defıbrıllıatorlar ornatýdy qolǵa alyp otyr.
«Aq júrek» qoǵamdyq qorynyń dırektory Rýslan Mashutov atalǵan qural elimizdiń barlyq bilim berý mekemeleri men qoǵamdyq oryndarda qoljetimdi bolýy kerek degen pikirde.
«Avtomattyq defıbrıllıatorlar mekteptegi medıtsınalyq pýnkterde nemese dene shynyqtyrý sabaǵy ótetin jerlerge ornatylýy kerek», - dedi medıa ortalyqtyń tilshisine bergen suhbatynda «Aq júrek» qorynyń dırektory.
Mamandardyń aıtýynsha atalǵan quraldyń eki túri bar. Biri medıtsınalyq uıymdarda qoldanylatyn kásibı qural, al ekinshisi - kez kelgen adam paıdalana alatyn avtomattyq defıbrıllıatorlar. Elorda mektepterine ornatylatyn defıbrıllıatorlar avtomattyq bolyp tabylady. Ony arnaıy medıtsınalyq bilimi joq adamdar qoldanyp, jedel járdem brıgadasy kelgenge deıin adam ómirin saqtap qalýǵa múmkindik beredi.
