2018 jyly «Báıterek» monýmentin jarty mıllıonnan asa adam tamashalaǵan
ASTANA. QazAqparat - «Astana-Báıterek» monýmenti - Qazaqstannyń astanasynyń sımvoly ári qalanyń kórikti oryndarynyń biri. Ótken jyly 500 myńnan asa Astana qonaqtary men týrıster osy nysanǵa baryp, qalanyń sol jaǵalaýyn bıikten tamashalaǵan, dep habarlaıdy qalalyq mádenıet jáne sport basqarmasy.
Resmı málimettere súıensek, 2018 jyly «Báıterek» monýmentine 584465 adam ekskýrsııalaǵan. Nysandy tamashalaýǵa kelgen halyq sany, ásirese, jaz aılarynda kúrt artty. Shilde aıynda 106902 kelýshi tirkelgen. Tamyzda «Báıterekti» 97 myńǵa jýyq qonaq kórse, maýsymda bul kórsetkish - 78 myńnan asqan.
«Báıterek» monýmenti 2002 jyly salyndy. Qurylystyń bıiktigi - 100 metr, konstrýktsııanyń basyndaǵy sharmen qosa alǵanda - 105 metr. Shardyń dıametri - 22 metr.
Aıta keteıik, elordada «EKSPO-2017» halyqaralyq mamandandyrylǵan kórmesin ótkizý kezinde monýmentke kelýshiler sany rekordty kórsetkishke jetken. Jarty jyldyń ishinde, 2017 jyldyń mamyr-jeltoqsan aılarynda monýmentti 500 myńnan asa adam tamashalaǵan.
