2018 jyly bankterdiń kapıtaldanýyna talaptar kúsheıtiledi - Q.Kelimbetov
ASTANA. QazAqparat - 2018 jyly bankterdiń kapıtaldanýyna qoıylatyn talaptar joǵarylaıdy. Bul týraly búgin Ortalyq kommýnıkatsııalar qyzmetindegi brıfıngte QR Ulttyq bankiniń tóraǵasy Qaırat Kelimbetov málim etti.
«Sońǵy qarjy daǵdarysynan keıin álemdik manetarlyq bılik banktik júıeniń táýekelderi men turaqtylyǵyna qatysty qadamdardy qaıta qarastyrdy. Onyń ishinde banktiń qadaǵalaý boıynsha Bazel komıteti ortalyq uıymy «Bazel-3» ataýymen keshendi sharalardyń toptamasyn usyndy. Bunda kapıtalǵa, lıkvıdtikke, kontrtsıkldilik jaǵdaıynda bankter jumysy máselesi turǵysynda belgili bir ózgertýler men talaptar qarastyrylǵan», - dedi ol.
Q.Kelimbetovtyń sózine qaraǵanda, Qazaqstanda 2015 jylǵy 1 qańtardan bastap bankter «Bazel-3» talaptaryna kóshýdi bastaıdy.
«Alǵashqy úsh jylda bankter úshin talaptar ózgermeıdi, alaıda 2018-2019 jyldardan bastap joǵary talaptar jasalady. Bizdiń josparǵa qaraǵanda, 2019 jylǵy 1 qańtarǵa qaraı bankter osy úderiske daıyn bolady jáne biz Qazaqstanda «Bazel-3» engizildi dep tolyq aıta alamyz», - dedi Ulttyq bank basshysy.
Sonymen qatar ol osy tektes talaptar saqtandyrý uıymdaryna da qatysty bolatynyn atap ótti.
«Jalpy bankterdiń kapıtaldandyrýǵa talaptar arta túsedi. Onyń ishinde jeke kapıtaldy kapıtaldandyrýǵa da talaptardy arttyrýǵa mán beriledi», - dedi ol.
