2018 jyly Astanada Horvatııa Elshiligi ashylady
ASTANA. QazAqparat - 2018 jyly Astanada Horvatııa Elshiligi ashylýy múmkin. Bul týraly búgin Horvatııanyń Qazaqstandaǵy Tótenshe jáne Ókiletti Elshisi mindetin qosa atqarýshy Tonchı Stanıchıch aıtty, dep habarlaıdy QazAqparat.
«Memlekettik hatshymen áńgimelesý barysynda eki eldiń arasyndaǵy ózara qarym-qatynastyń damýyna kóńilimiz tolatynyn aıttyq. Degenmen, adamnyń ár ýaqytta da kóńili tola bermeıdi. Ár kezde de munan da jaqsarta túsýge tyrysady. Kelesi jyly Astanada Horvatııanyń Elshiligi ashylyp qalýy múmkin. Bul mańyzdy oqıǵa bolar edi. Eki eldiń Úkimetteri arasynda sheshim qabyldanǵan», - dedi ol Aqordada QR Memlekettik hatshysy Gúlshara Ábdiqalyqovaǵa senim gramotasyn tapsyrǵannan keıin BAQ óilderine bergen suhbatynda.
Aıta keterligi, Horvatııa Elshisimen kezdesý barysynda Gúlshara Ábdiqalyqova Qazaqstannyń Horvatııany Ońtústik-Shyǵys Eýropadaǵy mańyzdy ári perspektıvaly seriktesteriniń biri retinde qarastyratyndyǵyn atap ótti. Ekonomıkalyq yntymaqtastyq deńgeıin arttyrý qajettigine kóńil aýdardy. Qazaqstanda shamamen 30 horvatııalyq kompanııa jumys isteıdi. Elder arasyndaǵy taýar aınalymy bıylǵy qańtar-qyrkúıekte 301 mln dollar boldy. Memlekettik hatshy qazaqstandyq kompanııalar bıdaı men mal sharýashylyǵy ónimderin jetkize alatynyn aıtty.
