2018 jylmen salystyrǵanda elordada bıyl áleýmettik páter sany 9 esege artady

NUR-SULTAN. QazAqparat - Elorda ákimi Altaı Kólginov áleýmettik páterler sany artqanyn, sol sııaqty Almaty aýdanynda birqatar mekteptiń qurylysy júrgizilip jatqanyn málim etti, dep habarlaıdy QazAqparat qala ákimdigine silteme jasap.

«Elorda aýdandaryn «Nur-Sultan - jaıly qala« master jospary aıasynda damytyp jatyrmyz. Aýdandar polıortalyq qaǵıdatyna saı damýda, ıaǵnı qajetti áleýmettik nysandar jaıaý qashyqtyqta ornalasqan. Búgingi tańerteńgilik aralaý barysynda birqatar jeńildikpen beriletin qoljetimdi turǵyn úı qurylysynyń barysymen tanystym. Áleýmettik turǵyn úı Almaty aýdanynda ornalasqan. Turǵyn úı kesheniniń birinshi qabattarynda ońaltý ortalyqtary, balabaqshalar, balalarǵa arnalǵan úıirmeler jáne t. b. áleýmettik nysandar ashylady», - dep jazdy qala ákimi.

Onyń aıtýynsha, Almaty aýdanynda birqatar jańa mektep salynyp jatyr. Bul bir mezgilde jańa TK turǵyndarynyń oqýshy oryndaryna degen qajettiligin jabýǵa múmkindik beredi.

«Úılerdiń sapasyna, abattandyrýǵa erekshe nazar aýdarýdy, qurylys qarqynyn tómendetpeýdi tapsyrdym. Sapasyz jumys qabyldanbaıdy.

Memleket basshysynyń tapsyrmasyna sáıkes jeńildikpen beriletin qoljetimdi turǵyn úı kólemin ulǵaıtý boıynsha josparly jumys júrgizip jatyrmyz. Bıyl kórsetkishti 10 myń áleýmettik páterge deıin kóterýdi josparlap otyrmyz. Kórsetkish 2018 jylmen salystyrǵanda 9 esege artady», - dedi ákim.

Aıta keterligi, qalada 2019 jyly 2 900 áleýmettik páter salynyp, paıdalanýǵa berilse, ótken jyly 7 myńnan astam páter salynǵan.