2018 jylǵy ulttyq qurama sapyna kiretin boksshylardyń esimderi ataldy
ASTANA. QazAqparat - Myrzaǵalı Aıtjanov bastaǵan bapkerler shtaby ulttyq quramanyń jańadan jasaqtalǵan tizimine enetin boksshylardyń esimderin atady, dep habarlaıdy QazAqparat.
2018 jyly bizdiń boksshylardy kóptegen halyqaralyq týrnırler kútip tur. Onyń eń bastysy Indonezııada ótetin Azııa oıyndary bolmaq, dep málim etti Qazaqstan boks federatsııasynyń baspasóz qyzmeti.
Ulttyq qurama sapyna olımpıada chempıony Danııar Eleýsinov, 2017 jyldyń álem chempıony Qaırat Eralıev, álem jáne Azııa chempıony Jánibek Álimhanuly, Olımpıada oıyndarynyń eki márte kúmis júldegeri Ádilbek Nııazymbetov, Olımpıadanyń kúmis júldegeri, Azııanyń úsh dúrkin chempıony Vasılıı Levıt, Azııa chempıony Berik Ábdirahmanov jáne Azııa chempıonatynyń kúmis júldegeri Zakır Safıýllın kirdi.
«Komandany álem jáne Qazaqstan chempıonattarynyń nátıjeleri arqyly jasaqtadyq. Alaıda bul tizimde turǵannyń barlyǵy Azııa oıyndaryna barady degen sóz emes. Jigitterdi myqty daıyndyqtan ótkizý úshin áli de tekserý, shyńdaý týrnırleri ótedi. Halyqaralyq rıngte ózin-ózi kórsete alǵan jáne medal alýǵa bar kúshin salatyndar ǵana Azııa oıyndaryna barady», - dedi Myrzaǵalı Aıtjanov.
M Aıtjanov sonymen qatar, komanda sapyndaǵy boksshylardyń jastaryna baılanysty da óz pikirin bildirdi.
«Óziniń rıngtegi myqtylyǵyn kórsete bilgen boksshyny biz ardager dep aıta almas edik. Jasy kelgen sportshylar dem alady. Al bizdiń jigitter rıngte áli atoı salyp júr. Onyń ústine AIBA boksshylarǵa 40 jasqa deıin óner óner kórsetýge ruqsat beredi», - dedi bas jattyqtyrýshy.
