2018 jylǵy ÁCh-nyń resmı doby tanystyrylmaı jatyp, fotosy ınternetke tarady
ASTANA. QazAqparat - Áleýmettik jelilerde 2018 jyly fýtboldan Reseıde ótetin álem chempıonatynyń resmı dobynyń fotosy jarııalandy, dep habarlaıdy QazAqparat tilshisi.
Fotosýret Footy Headlines portalynyń Twitter áleýmettik jelisindegi mıkroblogynda paıda boldy.
Habarlanǵandaı, dopty «Adidas» kompanııasy ázirlep, «Telstar 18» ataýyn bergen. «Bul qazirgi zamanǵy fýtboldyń sımvolyna aınalǵan «Telstar» túpnusqa doptyń zamanaýı ınterpretatsııasy», - dep jazdy Footy Headlines.
Portaldyń málimeti boıynsha, doptyń resmı tanystyrylymy 1 jeltoqsan kúni Álem kýbogynyń fınaldyq týrnırine jerebe tartylǵannan keıin ótedi. Alaıda, buǵan deıin TASS agenttigi «Reseı-2018» uıymdastyrý komıtetiniń bas dırektory Alekseı Sorokınge silteme jasap habarlaǵandaı, tusaýkeser 9 qarashada ótpek.
Esterińizge sala keteıik, Reseıdegi álem chempıonaty keler jyldyń 14 maýsymy men 15 shildesi aralyǵynda ótedi.
Bul dúbirli dodaǵa qazirge deıin Germanııa, Islandııa, Reseı, Kolýmbııa, Belgııa, Anglııa, Ispanııa, Polsha, Serbııa, Frantsııa, Portýgalııa, Brazılııa, Ýrýgvaı, Argentına, Japonııa, Ońtústik Koreıa, Iran, Saýd Arabııasy, Kosta-Rıka, Nıgerııa, Panama, Mysyr jáne Meksıka quramalary joldama alyp úlgergen.
