2018 jylǵa qaraı Qazaqstanda halyqtyń 95 paıyzy sandyq efırlik habar taratýmen qamtylady

ASTANA. QazAqparat - Dúnıejúzilik ekonomıkalyq forýmnyń jahandyq reıtınginde Qazaqstan uıaly baılanys abonentteri sany boıynsha jan basyna shaqqanda 7-shi orynda. Bul týraly Baılanys jáne aqparat qyzmetkerleri kúnine oraı ótken saltanatty sharada QR Aqparat jáne kommýnıkatsııalar mınıstri Dáýren Abaev málim etti.

«Sońǵy jyldary telekommýnıkatsııa men poshta baılanysy naryǵy qarqyndy damyp kele jatyr. Dúnıejúzilik ekonomıkalyq forýmnyń jahandyq reıtınginde Qazaqstan uıaly baılanys abonentteri sany boıynsha jan basyna shaqqanda 7-orynda»,-dedi mınıstr.

Sonymen qatar D. Abaev keń jolaqty Internetke qoljetimdilik turǵysynda Qazaqstan 58-orynda ekenin, al Internetke mobıldi qoljetimdilik baǵytynda abonentter sany boıynsha 44-orynda turǵanyn jetkizdi.

«Búginde qazaqstandyqtardyń 70 paıyzynan astamy Internet jelisinde paıdalanýshy bolyp tabylady. Aýyldyq jerlerdi mobıldi baılanyspen qamtý josparly túrde keńeıip keledi. Halyqty sandyq efırlik habar taratýmen qamtý 77 paıyzdy qurady, degenmen de bul kórsetkishti 2018 jylǵa qaraı 95 paıyzǵa jetkizýdi kózdep otyrmyz»,-dedi mınıstr.