2018 jylǵa deıin Qazaqstannyń taý-ken metallýrgııalyq salasynda 1,3 trln. teńge ıgeriledi - Prezıdent
ASTANA. QazAqparat - 2018 jylǵa deıin Qazaqstannyń taý-ken metallýrgııalyq ónerkásibinde jalpy somasy 1,3 trln. teńgeni quraıtyn 31 ınvestıtsııalyq jobany iske asyrý josparlanǵan. Bul týraly búgin Astanada Qazaqstannyń ÚIID memlekettik baǵdarlamasyn júzege asyrýǵa arnalǵan keńeste Memleket basshysy Nursultan Nazarbaev málim etti.
«Taý-ken metallýrgııalyq ónerkásibin damytý boıynsha 5 jyldyq josparǵa sáıkes, 2018 jylǵa deıin jalpy somasy 1,3 trln. teńgeni quraıtyn 31 ınvestıtsııalyq jobany iske asyrý josparlanǵan»,-dedi Prezıdent. «Geologııalyq barlaý vedomstvosy bizde joq. Barlyq kásiporyndar óndirip jatyr jáne eshqaısysy qordyń kólemin arttyryp otyrǵan joq. Biz ázirlegen osy baǵdarlama boıynsha boljamdy resýrstardyń ósimi bolady dep kútilýde. Máselen, altyn 400 tonnaǵa deıin, mys, polımetan - 12 mln. tonna, sondaı-aq munaı-gaz jáne basqa resýrstar boıynsha budan joǵary ósim jasalmaq»,-dedi Prezıdent.
