2018 jyldyń sońyna qaraı Brent munaıy 80 dollarǵa jetýi múmkin

ASTANA. QazAqparat - Alparı saraptamalyq departamentiniń dırektory Aleksandr Razývaev QazAqparat tilshisine bergen suhbatynda 2018 jyldyń sońyna qaraı munaı baǵasy 80 dollarǵa jetýi múmkin degen boljamymen bólisti.

«Kúlkige qalǵyń kelse, munaıdyń baǵasyna boljam jasa» degen sóz bar. Degenmen, qazirgi ýaqytta munaıdyń baǵasyn belgileýdegi ahýalǵa qaraǵanda, ol tómendegennen góri joǵarylaıtyn sııaqty. Bul rette Saýd Arabııasyndaǵy jaǵdaı, OPEK+ kelisiminiń uzartylýynyń kútilýi de eń basty faktor bola almaıdy. Bastysy - munaıdyń tómen baǵasy kezinde ınvestıtsııalyq baǵdarlamalardyń kúrt qysqarýynan týyndaǵan usynystardyń tapshy bolýy. Biz aǵymdaǵy jyldyń sońynda Brent markili munaıdyń barreli 60-65 dollar, al 2018 jyldyń sońynda 70-80 dollarǵa barady dep boljap otyrmyz», - Aleksandr Razývaev.

Sonymen qatar sarapshy aǵymdaǵy jyldyń kúzinde baıqalǵan munaı baǵasynyń ósýine qaramastan teńge baǵamynyń álsireýine qatysty qubylysqa da túsinik berýge tyrysty.

«AQSh Federaldy rezervtik júıesiniń stavkasy kóterilip, balansynyń qysqarýy aıasynda damýshy naryqtardyń barlyǵynyń valıýtasy qysymǵa tap bolady. 2017 jyldyń qorytyndysynda paıyzdyq stavka jyldyq mánde 1,25-1,50 paıyz dıapazonyna deıin jetýi múmkin. 2018 jyly Federaldy rezerv júıesi stavkany úshke arttyrýdyń qazirgi josparyn ustanýyn jalǵastyra beretin sııaqty. Esterińizge sala ketsem, teńgeniń álsiz bolýy eksporttaýshylar men bıýdjetke tıimdi», - dedi ol.