2018 jyldyń naýryzynda Úlken Almaty aınalma jolynyń qurylysy bastalady
ASTANA. QazAqparat - 2018 jyldyń naýryzynda Úlken Almaty aınalma jolynyń qurylysy bastalady. Bul týraly «QazAqparat» agenttigine QR IDM Avtomobıl joldary komıteti tóraǵasynyń orynbasary Satjan Ablalıev málim etti.
«Úlken Almaty aınalma joly memlekettik-jekeshelik áriptestik tetigimen salynatyn bolady. Qazirgi kezde Túrkııa jáne Koreıadan ınvestorlar tabyldy. Olar 150 mıllıard teńgeden astam qarjyny osy jolǵa jumsaýǵa ázir. Osy oraıda tıisti kelisimshartty bekitý sharalary aıaqtalýǵa taıaý. Aldaǵy jyldyń naýryz aıy kezinde joldaǵy qurylys jumystaryn bastaýdy josparlap otyrmyz»,-dedi Satjan Ablalıev Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynan keıin.
Aıta keteıik, Úlken Almaty aınalma joly 66 shaqyrymdy qurap otyr. Joba aıasynda 6 jolaqty avtomagıstraldiń qurylysy eskerilgen. Osy oraıda bul joba arqyly Almatynyń kólik júıesine túsip otyrǵan salmaq aıtarlyqtaı tómendemek.
Budan buryn habarlanǵandaı , bıyl maýsymda QR Investıtsııalar jáne damý mınıstri Jeńis Qasymbek Úlken Almaty aınalma joly qurylysyna qatysty túsinik bergen bolatyn.
Qalanyń ınjenerlik-kommýnıkatsııalyq qurylymyn damytý máselesi «Almaty-2020» Damý baǵdarlamasynda jan-jaqty kózdelgen.
Atalǵan qujat 2015 jyly qoǵamdyq talqylaýdan ótti.
2020 jylǵa qaraı jaqsy jáne qanaǵattandyrarlyq jaǵdaıdaǵy jergilikti avtomobıl joldarynyń sapasyn 80%-ǵa arttyrý kózdelgen. 2015 jyly bul kórsetkish 65% boldy.
Qolda bar málimetter boıynsha jaqsy jáne qanaǵattanarlyq jaǵdaıdaǵy avtomobıl joldary 2013-2015 aralyǵynda 41%-dan 65%-ǵa deıin ósken.
Avtojoldar qorynyń jaǵdaıyn jaqsartý maqsatynda jyl saıyn jańadan joldar salynady jáne burynnan bar joldar jóndeýden ótedi. 2013 - 2015 jyldar aralyǵynda jańadan 9,5 km jol salynǵan, 20,7 km bolatyn magıstraldy kóshe sozylǵan, 10,2 km jol kúrdeli jóndeýden ótken, 388,5 km jolǵa aǵymdaǵy jáne ortasha jóndeý jumystary júrgizilgen. Biraq, jóndeý jumystarynyń biryńǵaı tizilimi jáne qalanyń aýmaǵyndaǵy joldardyń kartasy joq ekeni baıqalady.
