2018 jyldyń maýsymynda elordada 25-shi Búkilálemdik taý-ken kongresi ótedi
ASTANA. QazAqparat - 2018 jyldyń 19-22 maýsymynda elordada 25-shi Búkilálemdik taý-ken kongresi ótedi. Bul týraly búgin elordadaǵy Táýelsizdik saraıynda ótip jatqan VIII Halyqaralyq taý-ken metallýrgııa kongresi barysynda QR Investıtsııalar jáne damý birinshi vıtse-mınıstri Alık Aıdarbaev málim etti, dep habarlaıdy QazAqparat.
«2018 jyly Astana qalasynda ótetin 25-shi Búkilálemdik taý-ken kongresine daıyndyq jumystary qarqyndy júrgizilip jatyr. 2013 jyly elimiz 25-shi Búkilálemdik taý-ken kongresin ótkizý quqyǵyn jeńip alǵan bolatyn jáne 2016 jyly Brazılııada ótken 24-shi Búkilálemdik taý-ken kongresi barysynda maı shamy túrindegi sımvoldyq estafetany qabyldady» - dedi birinshi vıtse-mınıstr.
Onyń atap ótýinshe, Búkilálemdik taý-ken kongresi bul taý-ken metallýrgııa salasynyń aýqymdy sharasy. Ol 2-3 jylda bir ret ótkizilip turady. Ony álemdik metallýrgııalyq ónerkásip úshin ózindik olımpıadasy desek te bolady.
«25-shi Búkilálemdik taý-ken kongresi Astanada 2018 jyldyń 19-22 maýsym aralyǵynda EKSPO-2017 pavılondary aýmaǵynda ótedi dep kútilýde. 2018 jyly Búkilálemdik taý-ken kongresin ótkizý álemdik qoǵamdastyqqa Qazaqstannyń taý-ken metallýrgııa kesheniniń áleýetin pash etýge jáne taý-ken metallýrgııa keshenine ınvestıtsııanyń quıylýyna tamasha múmkindik beredi», - dedi Aıdarbekov.
