2018 jyldyń kóktemi men jazyna arnalǵan aýa raıy boljamdary
ASTANA.QazAqparat - "Qazgıdromet" RMK 2018 jyldyń kóktemi men jazyna arnalǵan aýa raıy boljamdaryn málim etti, dep habarlaıdy QazAqparat tilshisi.
"Aýa-raıyna uzaq merzimdik boljam boıynsha, elimizdiń soltústik óńirlerinde sáýirdiń ortasy men úshinshi onkúndik arasynda Orta Azııadan engen jyly aýa massalaryna baılanysty aýa temperatýrasy túnde 3...8 jyly, kúndiz 10...15 gradýsqa deıin kóteriledi" - dep jaýap berdi "Qazgıdromet" RMK baspasóz qyzmeti "QazAqparat" agenttiginiń resmı saýalyna.
Sınoptıkterdiń habarlaýynsha, mamyr aıy respýblıka aýmaǵynda jyly jáne jaýyn-shashyndy bolady dep kútilýde, tek respýblıkanyń ońtústik-batysynda, ońtústigi men ortalyǵynda jaýyn-shashyn normadan az túsedi.
Maýsym-shilde aılarynda respýblıkanyń batysy men ońtústigin qospaǵanda, jaýyn-shashyn mólsheri normadan asady dep boljanýda.
"Tamyz aıynda elimizdiń batys bóliginde aýanyń ortasha aılyq temperatýrasy 1...2°S-qa kóteriledi, al qalǵan aımaqtarda burynǵy jyldardaǵydaı. Jańbyr mólsheri elimizdiń basym bóliginde normadan az bolmaq, tek Soltústik Qazaqstan, Aqmola, Shyǵys Qazaqstannyń soltústiginde, Almaty oblysynyń taýly jáne taý bókteri aımaǵynda ǵana normaǵa jýyq bolady", - delingen baspasóz qyzmetiniń jaýabynda.
Sondaı-aq, Qazgıdromet maýsymdyq boljamdardyń aılyq, onkúndiktik jáne táýliktik boljamdarmen naqtylanyp turatynyn atap ótti.
Eske sala ketsek, demalys kúnderi Qazaqstannyń ońtústik oblystaryna Irannan belsendi bult silemderi jyljyp keledi. "Saldarynan jeksenbi jáne dúısenbi kúnderi jańbyr jaýady, naızaǵaı jáne ekpindi jel kútiledi. Sýyq aýa aǵymdarynyń áserinen burshaq jaýýy da múmkin. Respýblıkamyzdyń ońtústigi men shyǵysynda temperatýra normaǵa jaqyn bolady", - dep habarlaıdy sınoptıkter.
Al elimizdiń soltústiginde jaýyn-shashyn bolmaıdy. Odan keıin Batys Sibirden keletin sýyq arktıkalyq aýa aǵyndary jańbyr jáne syrǵaq qar túrinde jaýýy múmkin. Batysta, soltústikte jáne elimizdiń ortalyǵynda aýa temperatýrasy ádettegiden 1-3°S-qa tómen bolady.
