2018 jyldan bastap jylyna keminde 50 mektep salý kerek - Saǵadıev
ASTANA. QazAqparat - 2018 jyldan bastap Qazaqstanda jylyna keminde 50 mektep salý kerek. Bul týraly búgin QR Úkimeti otyrysynda elimizdiń Bilim jáne ǵylym mınıstri Erlan Saǵadıev aıtty.
«Qazaqstanda 2015 jylǵy 1 qazandaǵy málimetter boıynsha 156 apatty jáne úshaýysymdy mektep bolǵan. Olardy joıý 2018 jyldyń aıaǵyna josparlanyp otyr. Kóbisi Almaty jáne Ońtústik Qazaqstan oblystarynda. Endi, 2015 jyly 6 mektep salynsa, bıyl 51 mektep salynyp otyr. Kelesi, 2017 jyly 99 mektep salynyp, ashylady. Jyl saıyn oqýshylardyń sanynyń ósýi men ýrbanızatsııa úderisteri júrip jatyr. Ári qaraı qalalarda mektepterdi salý kerek de esepteımiz»,- dedi mınıstr.
Onyń atap ótýinshe, mınıstrlik mektep tapshy óńirlerdiń arnaıy kartasyn ázirlegen. Atalǵan qujatqa sáıkes 2018 jyldan bastap jyl saıyn keminde 50 mektep salý qajet bolmaq.
«Mınıstrlik bıýdjet qarajatyn ıgerý boıynsha aı saıyn monıtorıng júrgizip otyrady. Aǵymdaǵy jyldyń 8 aıynyń nátıjesinde jergilikti atqarýshy organdar sharttardyń kesh jasalýyna, sot isterine baılanysty 3 mlrd. teńgeni ıgermegen. Osy monıtorıngke sáıkes 5 mıllıonǵa jýyq qarjyny Astana, Almaty qalalary, Shyǵys Qazaqstan, Ońtústik Qazaqstan, Qaraǵandy oblystary óz ýaqytynda jumsaı almaı otyr», - dedi E.Saǵadıev.
