2018 jyldan bastap jedel járdem kóliginiń túsi ózgeredi
ASTANA. QazAqparat - 2018 jyldan bastap elimizdegi barlyq jedel járdem kólikteri aqshyl kúlgin tústen sary túske boıalady, dep habarlaıdy Elorda Aqparat .
Sondaı-aq, kólikter jaryq túsiretin elementtermen erekshelenetin bolady.
Bul qadam halyqaralyq tájirıbege súıene otyryp jasaldy. Damyǵan memleketterdegi shuǵyl qyzmet kóligin qanyq tústerge, onyń ishinde lımon túsine boıaý jıi kezdesedi.
Saraptamaǵa sáıkes, qanyq túske boıalǵan jedel járdem kóligi basqa kólikterge qaraǵanda birden kózge túsedi. Bul dárigerlerdiń jedel ári qaýipsiz qyzmet kórsetýine kómektesedi dep senedi mınıstrliktegiler. Medıtsınalyq qyzmetti jaqsartý men onyń áleýetin arttyrý tek sanıtarlyq avtokóliktiń jańa dızaınymen shektelmeıdi. Mınıstrlik medıtsınalyq qyzmetkerlerdi zamanǵa saı jabdyqtarmen jáne jańa formamen qamtamasyz etedi. Sonymen qatar, normatıvtik-quqyqtyq bazany rettep, dárigerler men júrgizýshilerdi oqytýdyń jańa júıesin engizý arqyly medıtsınalyq qyzmet kórsetý sapasyn arttyrýdy kózdeıdi.
«Búgin Qazaqstan medıtsınasyndaǵy tarıhı kún deýge bolady. Osy jobanyń júzege asyrylýyn biz kóp kúttik. Halyqtyń basym kópshiligi kólikterdi basqa túske boıaý beker shyǵyn dep oılaýy múmkin. Alaıda muny isteýimizdiń birqatar sebepteri bar. Qazaqstanda, onyń ishinde Astanada kólik aǵynynda aq tústi kólikterdi jıi baıqaımyz. Endigári sary túspen erekshelengen mashınany jedel járdem ekendigin ańǵarý kúndizgi ýaqytta da, túngi ýaqytta da qıynǵa soqpaıtyn bolady. Mınıstrlik Soltústik Amerıka men Eýropa elderiniń tájirıbesin zertteı kele, Qazaqstanǵa ózindik dızaındy oılap tapty, - deıdi Jedel járdem qyzmetin modernızatsııalaý komıssııasynyń tóraǵasy Kevın Frık.
Aıta keteıik, jańa jyldan bastap búkil respýblıka boıynsha 1894 jedel járdem kóligi sary túske boıalady.
