2018 jyldan bastap «Qazaqstan tarıhy» tek qazaq tilinde oqytylady
ASTANA. QazAqparat -2018 jyldan bastap barlyq mektepterde «Qazaqstan tarıhy» páni qazaq tilinde oqytylady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR BǴM vıtse-mınıstri Taqır Balyqbaev málim etti.
«2018-2019 oqý jylynan bastap, barlyq mektepterde «Qazaqstan tarıhy» páni qazaq tilinde, «Dúnıejúzi tarıhy» orys tilinde jáne birqatar pánder aǵylshyn tilinde oqytylady dep josparlap otyrmyz. Olar: ınformatıka, hımııa, bıologııa jáne fızıka pánderi», - dep túsindirdi T.Balyqbaev.
Sonymen qatar eldegi mektepterde aǵylshyn tilin oqytý saǵattary kezeń-kezeńimen ulǵaıtylady.
«Bizde birneshe jyl buryn aǵylshyn tilin birinshi synyptardan bastap oqytý engizilgen bolatyn. Bıyldan bastap, biz aǵylshyn tilin oqytý saǵattaryn aptasyna 1-den 2 saǵatqa deıin kóbeıttik. Bizdiń maqsatymyz - balalardyń bastaýysh synyptardan bastap aǵylshyn tilinde sóılesýdiń bastapqy deńgeıin meńgerýin qamtamasyz etý. Onyń ústine 2018-2019 oqý jylynda Qazaqstanda úsh tildi oqytý modeli engizilgennen keıin, birqatar pánderdi qazaq, orys, aǵylshyn tilderinde oqytylady», - dedi vıtse-mınıstr.
