2018 jyldan aýyldyq okrýg deńgeıindegi bıýdjette ózgerister bolady

ASTANA. QazAqparat  - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy, dep habarlaıdy QazAqparat.

«Zań jobasynda jergilikti ózin-ózi basqarýdyń derbes bıýdjeti men kommýnaldyq menshikti engizý, jergilikti ózin-ózi basqarý organdarynyń bıýdjettik protsesi men kommýnaldyq menshikti basqarý ókilettigin keńeıtý kózdelgen. Ózderińizge belgili, elimizdiń bıýdjet júıesi úsh deńgeıden turady. Aýyldar, kentter, aýyldyq okrýgter deńgeıinde derbes bıýdjet joq. Olar shamamen 2,5 myń ákimshilik birlikti quraıdy»,-dep toqtaldy QR Ulttyq ekonomıka vıtse-mınıstri Aıbatyr Jumaǵulov.

Onyń sózine qaraǵanda, 2018 jyldyń 1 qańtarynan bastap 2 myńnan astam turǵyny bar aýyldyq okrýgtiń deńgeıinde jergilikti ózin-ózi basqarýdyń bıýdjetine memlekettik bıýdjettiń tórtinshi deńgeıi engiziledi, 2020 jyldan bastap barlyq jerde qamtylady. Elimizde 2 myńnan astam adam turatyn 1 066 eldi meken bar.

Sonymen qatar A. Jumaǵulov jergilikti ózin-ózi basqarýdyń bıýdjeti qalaı túziletinin habarlady. Olardyń bıýdjetiniń kirisi jeke tabys salyǵynan, jeke tulǵalardyń múlik salyǵynan, jeke jáne zańdy tulǵalardyń kólik salyǵynan, jer salyǵynan jáne ózge de tólemderden qamtylady.

Sonymen qatar ol bıýdjet salyqtyq emes túsimderden de qalyptasatynyn jetkizdi.

Zań jobasymen segiz zańnamalyq aktige ózgerister men tolyqtyrýlar engiziledi. Olardyń ishinde elimizdiń Azamattyq kodeksi, Bıýdjet kodeksi, «Salyq jáne bıýdjetke tólenetin basqa da mindetti tólemder týraly» kodeks (Salyq kodeksi), Ákimshilik quqyq buzýshylyq týraly kodeksi, sondaı-aq «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Jarnama týraly», «Memlekettik múlik týraly» jáne «Kásiptik odaqtar týraly» zańdar bar.

Qujat aýdandyq mańyzy bar qalalardyń, aýyldardyń, kentterdiń, aýyldyq okrýgterdiń derbes bıýdjetin, ıaǵnı bıýdjettiń jańa tórtinshi deńgeıin kezeń-kezeńmen engizýdi, sondaı-aq jergilikti ózin-ózi basqarýdyń kommýnaldyq menshik ınstıtýtyn engizýdi kózdeıdi. Jergilikti ózin-ózi basqarý bıýdjetin qalyptastyrý, bekitý jáne oryndaý tártibi zańnamalyq túrde bekitiledi. Jergilikti ózin-ózi basqarý organdarynyń bıýdjet protsesin jáne jergilikti ózin-ózi basqarýdyń kommýnaldyq múlkin basqarý jónindegi ókilettikteri naqtylanyp, tolyqtyrylady.

Zań jobasy Palatanyń qaraýyna jiberildi.