2018 jyl qazaqstandyq paralımpıadashylar úshin tabysty boldy
ASTANA. QazAqparat - Bıylǵy jyl kóptegen qazaqstandyq sportshylar úshin tabysty bolmady: qysqy Olımpıadada jalǵyz «qol», Azıada tarıhyndaǵy eń nashar nátıje, Ulttar lıgasyndaǵy oryndalmaǵan mindetter, dıskvalıfıkatsııadan keıin qaıta oralǵan aýyr atletterdiń kóńil kónshitpegen óneri, bıatlondaǵy dopıng daýy.
Degenmen, jetistikterden de qur alaqan emespiz. Ásirese, paralımpıadashylardyń nátıjeleri birshama kóńilge demeý bolyp otyr. «SPORTINFORM» SAA qazaqstandyq paralımpıadashylar 2018 jyldy qalaı ótkizgenin eske alýdy usynady.
Phenchhan-2018
Phenchhandaǵy qysqy Paralımpıada oıyndaryna Qazaqstan atynan alty sportshy, sondaı-aq bir sportshy-gıd bardy. Degenmen, sportshylardyń shaǵyn quramy tarıhı nátıjelerge jetýge kedergi bolǵan joq. Eń aldymen, Aleksandr Gerlıts 20 km qashyqtyqqa erkin ádispen shańǵy jarysynda tórtinshi oryn aldy. Bul, Qazaqstan úshin sońǵy 14 jyldaǵy Paraoıyndardaǵy eń joǵary nátıje. 1994 jyly Lıýbov Vorobeva Paralımpıadada kúmis medal alǵaly beri, bizdiń sportshylar ol nátıjeniń mańaıyna jolaı almap edi.
Biraq Gerlıtstiń nátıjesinen keıin araǵa eki kún salyp 45 jastaǵy Aleksandr Kolıadın 1,5 km qashyqtyqqa klassıkalyq ádispen shańǵy jarysynda Qazaqstan tarıhyndaǵy tuńǵysh Paralımpıada «altynyn» jeńip aldy. Osy nátıje jalpykomandalyq esepte 20-orynǵa kóterilýge, al júldegerlerge álemdegi eń joǵary syıaqy alý múmkindigin berdi. Eske sala keteıik, «altynǵa» bizde 250 000 dollar, al tórtinshi oryn úshin 30 000 dollar beriledi. Álemniń basqa birde-bir memleketi mundaı syıaqy tólemeıdi.
Djakarta-2018
Paralımpıadashylardyń jeńisti joly Indonezııada ótken Paraazıada oıyndarynda da jalǵasty. Azıada-2018 Qazaqstan sporty tarıhynda eń nashar doda bolǵanyn aıta keteıik. Onyń qorytyndylary boıynsha, otandyq sportshylar alǵash ret qurlyqta úzdik bestikke kire almaı, toǵyzynshy oryndy qanaǵat tutty.
Al paralımpıadashylar, kerisinshe, taǵy bir rekordqa qol jetkizdi. Sporttyń toǵyz túri boıynsha synǵa túsken olar 33 medal jeńip aldy. Bul qazaqstandyq sportshylardyń qurlyqtyq Oıyndardaǵy eń jaqsy nátıjesi. Buǵan deıin 2014 jyly 24 medalmen shektelgen edik.
Budan tys, sporttyń tórt túrinen alǵash ret úzdik úshtikke ilindik. Qola medal jeńip alǵan Qazaqstannyń paralımpıadalyq voleıbol quramasy komandalyq sport túrleri tarıhynda alǵash ret medalǵa qol jetkizdi.
Osy nátıjeler ózdiginen kelmegenin aıta ketken jón.
