2017 jyly Vetnamnan Qazaqstanǵa alǵashqy júk poıyzy attanýy múmkin
ASTANA. QazAqparat - Hanoıda Qazaqstan Respýblıkasynyń Vetnamdaǵy Elshisi Beketjan Jumahanovtyń Vetnam Kompartııasynyń OK Polıtbıýrosynyń múshesi, Vetnam Otandyq fronttyń Ortalyq komıtetiniń tóraǵasy Ngýen Thıen Nıanmen kezdesýi ótti, dep habarlaıdy QR SІM baspasóz qyzmeti.
Kezdesý barysynda taraptar qazaqstandyq-vetnamdyq ekijaqty qatynastardyń aǵymdy ahýaly men keleshekterin talqylady. Ózara múddelilik tanytqan túrli salalarda yntymaqtastyqty odan ári nyǵaıtýǵa qyzyǵýshylyq bildirildi.
VOF OK Tóraǵasy qazaqstandyq-vetnamdyq qatynastardyń odan ári serpindi damýy úshin múmkindiktiń mol ekendigin atap ótip, saýda-ekonomıkalyq salada yqpaldastyqty jandandyrýdyń mańyzdylyǵyna nazar aýdardy. Bul rette, suhbattasýshy 2016 jylǵy 5 qazanda kúshine engen Eýrazııalyq ekonomıkalyq odaq qatysýshy elderi men Vetnam arasyndaǵy erkin saýda aımaǵy týraly kelisimniń múmkindigin barynsha paıdalaný qajettiligine toqtaldy.
Óz tarapynan B.Jumahanov suhbattasýshyny «Nurly jol» atty QR Prezıdenti Nursultan Nazarbaevtyń Joldaýyn oryndaý aıasynda elimizdiń saıası jáne áleýmettik-ekonomıkalyq damýynyń negizgi úrdisteri men «Qazaqstan Respýblıkasynyń ári qaraı memlekettik qurylystyń 100 naqty qadamy» ulttyq Josparynyń negizgi erejeleri jóninde habardar etti. Elshi sondaı-aq qaýipsiz álemniń negizderin nyǵaıtýǵa jáne áskerı qaqtyǵystar men ıadrolyq apatty azaıtýǵa baǵyttalǵan «Álem. HHІ ǵasyr» jalpyálemdik damý jahandyq strategııasy boıynsha Elbasynyń bastamasy jóninde aıtty.
Elshi «EKSPO-2017» halyqaralyq mamandyrylǵan kórmesine daıyndyq barysy jóninde habardar etip, vetnam tarapyn osy kórmege belsene qatysýǵa shaqyrdy.
Saýda-ekonomıkalyq yntymaqtastyqqa kelgende, qazaqstandyq dıplomat Qazaqstannyń kóliktik-tranzıttik áleýeti, konteınerlik tasymaldaý arqyly, onyń ishinde «Lıanıýngan» (QHR) teńiz portyndaǵyqazaqstandyq termınal arqyly túrli baǵyttar arqyly jetkizýge bolatyndyǵyn jáne olar tasymaldaý ýaqytyn áldeqaıda qysqartatyny jóninde aıtty.
Suhbat sońynda Ngýen Thıen Nıan elderimiz arasyndaǵy saýda-ekonomıkalyq áriptestikti damytý boıynsha qabyldanyp jatqan sharalardy joǵary baǵalap, ózara tıimdi ekijaqty yntymaqtastyqty damytýǵa baǵyttalǵan Elshiliktiń bastamalary men kúsh-jigerin tolyq qoldaıtynyn atap ótti.
Osy rette, VOF OK Tóraǵasy taraptar kelesi jyly atap ótetin dıplomatııalyq qatynastardyń ornatylýyna 25-jyldyǵyna qaraı Vetnamnan Qazaqstanǵa alǵashqy temir jol júkti quram jetkiziletine úmit artty.
