2017 jyly tirkelgen avtomobılder sany 20% artqan
ASTANA. QazAqparat - 2017 jyldyń qorytyndysy boıynsha Qazaqstanda tirkelgen avtokólik quraldarynyń sany 19,2%-ǵa artqan, dep habarlaıdy «QazAqparat» HAA «QazAvtoProm» Qazaqstan avtomobıl salasyndaǵy kásiporyndar odaǵynyń baspasóz qyzmetine silteme jasap.
Atalyp ótilgendeı, 2017 jyldyń qańtar-jeltoqsan aralyǵynda ákimshilik polıtsııa organdary 1170584 avtokólik quraldaryn esepke qoıǵan, bul kórsetkish ótken jyldyń osy kezeńimen salystyrǵanda 19,2%-ǵa artqan. Onyń ishinde 1100684 tehnıkanyń ıesi aýysýyna baılanysty qaıta tirkelgen, bul kórsetkish byltyrǵymen (920654 dana) salystyrǵanda 19,6%-ǵa ósken. Birinshi ret tirkelgen avtokólik quraldarynyń sany 69 900-ǵa (13,7%-ǵa) artqan.
2017 jyldyń jeltoqsanynda esepke qoıylǵan kólik quraldarynyń sany 96773 birlikti quraǵan. Bul - ótken jylǵy kórsetkishten 8,7%-ǵa kóp.
2017 jyly qaıta tirkelgen kólik quraldarynyń úshten eki bóligin (66%) 10 jyldan asqan kólikter quraıdy. 20 jyldan asqan kólik quraldary eń kóp úleske ıe bolsa (36,2%, nemese 398 152 birlik), 11-20 jyl aralyǵyndaǵy kólikter sany - 29,4% (324 023 birlik), 8-10 jyl - 9% (99 492 avto), 4-7 jyl - 16,6% (183012), 1-3 jyl aralyǵyndaǵy kólikter sany - 7,6% (83985 avto), 1 jyldan az ýaqytty quraıtyn kólikter sany - 1,1% (12 020 birlik) bolǵan.
Bul kórsetkishter otandyq avtoparktiń eskirip jatqanyna dálel bola alady. 2017 jyldyń qorytyndysy boıynsha qaıta tirkelgen kólikterdiń eń kóp sany Almaty oblysynda (167 435), Ońtústik Qazaqstan oblysynda (148 048) jáne Almatyda (136 079) tirkelgen.
