2017 jyly respýblıkalyq bıýdjet shyǵystary 8,5 trln. teńgeni quraıdy

ASTANA. QazAqparat - 2017 jyly respýblıkalyq bıýdjet shyǵystary 8 563,1 mlrd. teńgeni quraıdy. Bul týraly búgin Parlament Májilisiniń jalpy otyrysynda QR Ulttyq ekonomıka mınıstri Qýandyq Bıshimbaev málim etti. Májilismender «2017-2019 jyldarǵa arnalǵan respýblıkalyq bıýdjet týraly» zań jobasyn talqylaýda, dep habarlaıdy QazAqparat.

«2017 jyly respýblıkalyq bıýdjet shyǵystary 8 563,1 mlrd. teńge, 2018 jyly  8 368,1 mlrd. teńge jáne 2019 jyly  8 746,8 mlrd. teńge kóleminde aıqyndaldy. Memleket basshysynyń tapsyrmalaryn eskere otyryp, ekonomıkalyq ósýdi jáne ónimdi jumyspen qamtýdy qamtamasyz etý maqsatynda 2017 - 2019 jyldarǵa arnalǵan respýblıkalyq bıýdjet jobasy shyǵystarynyń negizgi basymdyqtary agrarlyq sektordy údemeli damytý, ındýstrııalandyrý men shaǵyn jáne orta bıznesti damytý, kólik jáne áleýmettik ınfraqurylymdy damytý bolyp aıqyndaldy»,-dedi mınıstr.

Onyń sózine qaraǵanda, 2017 jyly JІÓ-niń naqty ósýi 1,9%, 2021 jylǵa qaraı 3,1% deıin ósýi boljanýda. Halyqtyń jan basyna shaqqandaǵy jalpy ishki ónim 2017 jylǵy 7,5 myń AQSh dollarynan 2021 jyly 10,0 myń AQSh dollaryna deıin ulǵaıady dep kútilýde.