2017 jyly Pavlodar oblysynda «ÚIID» baǵdarlamasy aıasynda 15 joba júzege asyrylady
Bul týraly búgin óńirlik kommýnıkatsııalar qyzmetinde ótken brıfıng barysynda ındýstrııalyq-ınnovatsııalyq damý basqarmasynyń basshysy Nurbolat Seıtmaǵambetov málim etti, dep habarlaıdy pavlodarnews.kz.
«Bıylǵy jyly qyrkúıek aıynda bastaý alǵan «Giessenhaus» jobasyna 4,5 mlrd teńge tartylǵan», - dedi ol. - Jospar boıynsha alıýmınıı quıyndysyn shyǵaratyn kásiporyndy kelesi jyly mamyr aıynda iske qosý kózdelip otyr. Sondaı-aq, 25 mlrd teńge salynǵan «Temir logistik» JShS, Pavlodar munaı-hımııa zaýytyn jańǵyrtý, «Prommashkomplekt» JShS-niń temirjol dóńgelekteri óndirisiniń kesheni, «Dáneker» ShQ» JShS-niń 600 gektar aýmaqta sýǵarý júıesi, «Romat» JShS-niń pavlodarlyq farmatsevtıkalyq zaýytynyń qurylysy, Ekibastuz et óńdeý zaýyty jáne taǵy basqa jobalar bar».
Basqarma basshysynyń aıtýynsha, óńirde 2015-2019 jyldary jalpy quny 1,3 trln teńgeni quraıtyn 37 jobany júzege asyrýdyń nátıjesinde 8,5 myń jumys orny ashylady. Bes joba Indýstrııalandyrý kartasy aıasynda, 32-si kásipkerlikti qoldaý kartasy boıynsha oryndalady. Ótken jyly oblysta bes kásiporyn iske qosylǵan. Onyń ishindegi asa aýqymdysy - Bozshakól ken-baıytý kombınaty men «Pavlodar» arnaıy ekonomıkalyq aımaǵyndaǵy kúıdirilgen munaı koksyn óndirý munaı-hımııalyq kásiporny. Bıylǵy jyly óńir ekonomıkasyna serpin bergen alty jobanyń ishinde Ekibastuz qalasyndaǵy temirjol osteri men dóńgelek juptaryn óndiretin «R.W.S Wheelset» JShS, «Pavlodar» arnaıy ekonomıkalyq aýmaǵyndaǵy «Agrohımprogress» JShS bar.
