2017 jyly qytaılyq týrıster Qazaqstanǵa qansha qarjy qaldyrdy
ASTANA. QazAqparat - Qytaı týrısteri úshin engizilgen 72 saǵattyq vızasyz rejim ózim tıimdiligin kórsetti. Bul týraly búgin Úkimet úıinde ótken baspasóz máslıhatynda QR Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat.
«2018 jyldyń sońyna deıin Qytaı azamattary úshin ilki rejimde engizilgen vızasyz 72 saǵattyq tranzıttik joba óz tıimdiligin kórsetti. EKSPO ótken úsh aıdyń ishinde 4,5 myń qytaılyq kelip, elimizdiń ekonomıkasyna árqaısysy 250-300 dollardan qaldyrdy», - dedi ol.
Mınıstrdiń aıtýynsha, taıaý ýaqytta mundaı rejimdi búginde ekonomıkasy qarqyndy damý jolyna túsip, halqy týrıstik saparmen jıi shyǵa bastaǵan Úndistan azamattaryna da engizý josparlanyp otyr.
«Bul týraly memlekettik organdarmen kelisilý ústinde. Degenmen, biz bul máseleni mindetti túrde sheshýimiz qajet dep oılaımyn. Sebebi Úndistan qarqyndy damyp keledi», - dedi Arystanbek Muhamedıuly.
Jalpy mınıstrdiń dereginshe, sońǵy 10 jylda týrızm jyldam qarqynmen damyp, álemdik ekonomıkadaǵy eń serpindi órleı túsken salalardyń birine aınaldy. Búginde týrızm álemdik ishki jalpy ónimniń 10 paıyzyn qurap, árbir 10-shy jumys ornyn qurýda. Dúnıe júzinde týrızm salasyna quıylatyn ınvestıtsııa kólemi 800 mlrd dollarǵa jetip otyr.
