2017 jyly kómir baǵasyndaǵy kólik qyzmetiniń úlesi 4 paıyzǵa ósti

ASTANA. QazAqparat - Elimizde kómir tasymaly artyp keledi, dep habarlaıdy QazAqparat «QTJ-Júk tasymaly» AQ baspasóz qyzmetine silteme jasap.

Kompanııa málimetteri boıynsha, ústimizdegi jyldyń 9 aıynda 74 myń tonnadan astam kómir tasymaldanǵan, bul byltyrǵy osy kezeńmen salystyrǵanda 19 paıyzǵa kóp. Onyń 23 myń tonnadan astamy eksportqa shyǵarylsa, qalǵanyn el ishindegi tasymaldar quraǵan.

Atap aıtqanda, esepti kezeńde «Bogatyr Kómir» JShS kómiri jospardan 3 paıyz, byltyrǵydan 22 paıyz artyq tasymaldanǵan, al «Shubarkól Kómir» JShS ónimin tasymaldaý qazirge 96 paıyz oryndalǵan, al 2016 jyldyń osy kezeńimen salystyrǵanda 40 paıyzǵa artyq tasymaldanǵan.

9 aılyq qorytyndylar boıynsha Aqmola, Pavlodar, Qaraǵandy, Atyraý oblystaryndaǵy kommýnaldyq-turmystyq kásiporyndarǵa kómir tasymaldaý jospary oryndalǵan.

Sonymen qatar kómir eksporty da arta túsken. Máselen, «Maıkóbeń Kómir» JShS kómir tasymaldaý jospary 88 paıyzǵa oryndalyp, byltyrǵy esepti kezeńnen 349 paıyzǵa artyq kómir tasymaldanǵan.

Ústimizdegi jyly kómir baǵasyna ketken kólik shyǵyndary byltyrǵymen salystyrǵanda orta eseppen 4 paıyzǵa artqan.  «QTJ-Júk tasymaly» JShS óz tarapynan kómir tasymalyna qatysty týyndaıtyn máselelerdi sheshý úshin barlyq amaldardy qarastyratynyn aıtady.