2017 jyly qazaqstandyq kásipqoı boksshylar qandaı belesterdi baǵyndyrdy

Álem kóz tikken qazaqstandyq «Big Drama Show»
  

2017 jylǵy álem jáne qazaq boksyndaǵy eń aıtýly oqıǵa orta salmaqtaǵy WBA (Super), WBC, IBF jáne IBO tujyrymdary boıynsha álem chempıony Gennadıı Golovkın (37-0-1, 33 KO) men eki salmaq boıynsha álemniń eks-chempıony Saýl Alvares (49-1-2, 34KO) arasyndaǵy jekpe-jek bolǵany sózsiz.

Gennadıı Golovkın 2017 jyly 2 jekpe-jek ótkizdi. 18 naýryz kúni «GGG» Nıý-Iork qalasynda WBA nusqasy boıynsha álem chempıony Denıel Djeıkobsty (33-2-0, 29KO) tóreshiler sheshimimen jeńdi. Bul jekpe-jek otandasymyzdyń kásipqoı bokstaǵy alǵashqy 12 raýndtyq beldesýi boldy.
 

16 qyrkúıekte Golovkın Alvarespen AQSh-tyń Las-Vegas qalasynda judyryqtasty. Jekpe-jek aldynda Golovkın tamasha «Big Drama Show» jasaýǵa ýáde berse, meksıkalyq boksshy óziniń jeńisine senimdi ekenin aıtty. Alaıda, boks mamandary «Ǵasyr jekpe-jegi» dep baǵalaǵan bul beldesý teń nátıjemen aıaqtaldy. Qorytyndysynda «GGG» barlyq chempıondyq beldikterin saqtap qaldy.

Chempıondyq beldik jáne reıtıng

Bul kúnde BoxRec portalyna resmı tirkelgen qazaqstandyq kásipqoı boksshylardyń sany 159-ǵa jetip, onyń 58-i 14 salmaq dárejesi boıynsha sharshy alańda óner kórsetip júr.

Birinshi aýyr salmaqta Beıbit Shúmenov (17-2, 11 KO) 2017 jyly kýbalyq ıÝnıerý Dortıkospen (21-0, 20 KO) WBA uıymynyń mindetti jekpe-jekin ótkizýi kerek bolǵan. Alaıda kelissózderdiń sátsiz bolýyna baılanysty jekpe-jek ýaqyty belgilenbeı, uzaq aılarǵa sozyldy. Maýsym aıynda sportshy kóz jaraqatyna baılanysty sporttyq mansabyn aıaqtaıtynyn jarııalady. Osylaısha,  Shúmenov WBA nusqasy boıynsha chempıondyq beldiginen bas tartyp, oǵan Dortıkos ıe boldy.
 

Bul salmaqta óner kórsetetin taǵy bir qazaqstandyq boksshy IBO Inter-Continental jáne GBC tıtýlynyń ıegeri Isa Aqberbaev (20-0-0,15 KO) bıyl eki jekpe-jek ótkizdi. Sportshy jeńisten keıin BoxRec birinshi aýyr salmaqtaǵy álemdik reıtınginde 37-orynǵa jaıǵasyp, IBO jáne WBA uıymynyń jańa reıtınginde 33 jáne 10-orynnan kórindi.
 

Jartylaı aýyr salmaqta 2016 jyldan beri óner kórsetip júrgen Álı Ahmedov (10-0, 7KO) aǵymdaǵy jyly 6 jekpe-jek ótkizip, eki chempıondyq beldikke qol jetkizdi.
 

Ahmedov 30 maýsymda AQSh-ta jergilikti boksshy Kent Hollandty (4-1-1, 2KO) nokaýdpen jeńip, Soltústik Amerıka Boks federatsııasy (NABF)  tıtýlyn ıelendi.

19 maýsymda otandasymyz jeńilip kórmegen amerıkalyq boksshy Kertıs Hılldy (10-0-0, 5KO) 4-raýndta nokaýdqa jiberip, WBC tujyrymy boıynsha jastar arasyndaǵy álem chempıony tıtýlynyń (WBC Youth World Light Heavyweight Title) ıegeri atandy. Kúni keshe ǵana Almatyda ótken kezekti jekpe-jeginde Ahmedov ázerbaıjandyq Ismat Eınýllaevty (12-2, 8 KO) ekinshi raýndta nokaýdqa jiberip, 11-shi jeńisine qol jetkizdi.

Orta salmaqta Gennadıı Golovkın 2 jekpe-jeginde de chempıondyq beldikterin tolyqtaı qorǵap qaldy. Boksshy barlyq boks uıymynyń chempıondyq beldikterin biriktirý maqsatyn oryndaı alǵan joq. Ol úshin otandasymyz WBO chempıony Bıllı Djo Sonderspen judyryqtasýy kerek. Alaıda, «GGG» 2018 jyly mamyr aıynda Alvarespen ekinshi kezdesý ótkizýdi josparlap otyrǵany belgili.
 

Al bul salmaqtaǵy taǵy bir qazaqstandyq boksshy Meıirim Nursultanov (5-0-0, 4KO) 1 jyl ishinde 4 ret sharshy alańǵa shyǵyp, BoxRec portalynda tirkelgen orta salmaqtaǵy 1046 boksshynyń ishinde 91-orynnan kórindi.

Birinshi orta salmaqta judyryqtasyp júrgen Qazaqstandyq boksshy Qanat Islam (25-0-0, 20KO) 2017 jyldy tabysty aıaqtady. Boksshy 2017 jyly sharshy alańǵa 3 ret kóterilip, qorjynyn eki chempıondyq beldikpen tolyqtyrdy. BoxRec reıtınginde otandasymyz birinshi orta salmaqtaǵy TOP-10 boksshylar qatarynan oryn aldy. Sonymen qatar, Qanat WBA jáne WBO uıymynyń birinshi orta salmaqtaǵy reıtınginiń kóshin bastap, IBO jáne WBC reıtınginde 7 jáne 8-orynǵa jaıǵasty.
  

2017 jyly 26 mamyr, Qanat Islam AQSh-ta meksıkalyq Norberto Gonsalesty tóreshiler sheshimimen jeńip, WBA Inter-Continental jáne WBO NABO tıtýlyn ıelendi. 9 qyrkúıekte Qanat EKSPO aıasynda Astana qalasynda óziniń chempıondyq ataqtaryn qorǵap, kanadalyq Brendon Kýkty 9-raýndta nokaýdpen jeńdi.
 

Kásipqoı boksta 5 jyl júrgen Qanat Islam bul kúnde WBA Fedelatin jáne WBA Inter-Continental, WBO Inter-Continental jáne WBO NABO tıtýlynyń ıegeri. Otandasymyz 2018 jyly WBA uıymy belgilegen mindetti qarsylasy amerıkalyq Djon Veramen (18-0, 11KO) judyryqtasýy mumkin.

Jartylaı orta salmaqtaǵy boksshy Janqosh Turarov (22-0-0, 15 KO) 2017 jyly 2 jekpe-jek ótkizip, álemdik retıngte 63-orynǵa kóterildi.
 

Birinshi jartylaı orta salmaqta 26 jastaǵy qazaqstandyq boksshy Batyrjan Júkembaev (11-0-0, 9KO) kanadada 4 kezdesý ótkizip, 3 jekpe-jegin ýaqytynan buryn aıaqtady. Batyrjan álemdik reıtıngte 50-orynǵa jaıǵasty.

Birinshi jeńil salmaqta WBA NABA USA jáne WBC EPBC tıtýlynyń ıegeri Bekman Soılybaev (12-0-0, 4KO) 29 mamyr kúni meksıkada venesýelalyq Samýel Gonsalespen  (16-5-0, 10KO) 10 raýnd judyryqtasyp, upaı basymdylyǵymen jeńiske jetti. Soılybaev sonymen qatar WBC International chempıondyq tıtýly ıegeri atandy.
 

Bekman Soılybaev 2017 jylǵy 3 jeńisinen keıin BoxRec portalynyń birinshi jeńil salmaqtaǵy álemdik reıtınginde 55 orynnan, WBC uıymynyń jeltoqsan aıyndaǵy reıtınginde 20-orynnan kórindi.

Jeńil salmaqtaǵy otandasymyz Janat Jaqııanov (27-2-0, 18 KO) bıyl sporttyq mansabyndaǵy ekinshi jeńilisine ushyrady.
 

10 aqpan kúni Jaqııanov AQSh-ta alǵash ret jekpe-jek ótkizdi. Otandasymyz jergilikti boksshy Roýshı Ýorrenmen (14-1, 4KO) jeńil salmaqtaǵy WBA (Super) jáne IBO tujyrymdary boıynsha álem chempıony tıtýlyn sarapqa saldy. Jaqııanov 2 ret nokdaýnǵa túskenine qaramastan, qarsylasymen 12 raýnd boıy judyryqtasyp, qorytyndysynda tóreshiler sheshimimen chempıondyq ataqtardy jeńip aldy.
 

22 qazan, Janat Jaqııanov ırlandııalyq boksshy Raıan Barnetten (17-0, 9 KO) tóreshiler sheshimi boıynsha jeńilip, chempıondyq beldiginen aıyrylyp qaldy.

Áıelder arasyndaǵy tuńǵysh qazaqstandyq álem chempıony

Bul kúnde áıelder arasyndaǵy kásipqoı boksta judyryqtasatyn 4 qazaqstandyq boksshy bar. Birinshi jeńil salmaqta óner kórsetip júrgen qazaqstandyq boksshy Fırýza Sháripova (7-1, 4 KO) 2017 jyly qazaq boks tarıhyndaǵy kásipqoı bokstan alǵashqy álem chempıony atanyp, úsh birdeı uıymnyń chempıondyq tıtýlyn jeńip aldy.
 

26 tamyz kúni Sháripova Astana qalasyndaǵy EKSPO kesheninde 10 raýndtyq kezdesý ótkizip, bolgarııalyq Mılena Kolevany aıqyn basymdyqpen jeńdi. Sondaı-aq, otandasymyz IBA álem chempıony beldigin ıelendi.
 

30 jeltoqsanda boksshy qyz Almatyda belgııalyq Djemılla Gontarıýkty (13-4-1, 2 KO) tóreshiler sheshimi boıynsha jeńip, IBO jáne WBC Silver tıtýlynyń ıegeri atandy.

Jańa esimder

2017 jyly 17 qazaqstandyq boksshy kásipqoı boksqa aýysty. Olardyń qatarynda  London jáne Rıo-de-Janeıro Olımpıadalarynda qatarynan eki dúrkin qola júldeger atanǵan Ivan Dychko, 2015 jylǵy Ǵalym Jarylǵapov týrnıriniń jeńimpazy Nurzat Sabyrov jáne qazaqstandyq belgili ánshi Ibragım Eskendir bar.

  

Aıta keterligi, Dychko 29 qyrkúıekte AQSh-ta debıýttyq kezdesýin ótkizip, 16 jeltoqsanǵa deıin 4 jekpe-jek ótkizip, barlyǵynda ýaqytynan buryn jeńiske jetti. Al án ónerinen boksqa bet alǵan Ibragım Eskendir 3 jáne 30 jeltoqsan kúni eki kezdesý ótkizip, eki qarsylasyn da nokaýdqa jiberdi.