2017 jyly Qazaqstanda memlekettik qyzmetkerlerdiń kirisi men shyǵysyn mindetti deklaratsııalaý engiziledi
ASTANA. QazAqparat - 2017 jyly Qazaqstanda memlekettik qyzmetkerlerdiń kirisi men shyǵysyn mindetti deklaratsııalaý engiziledi. Bul týraly búgin QR Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Alık Shpekbaev málim etti.
«2017 jyly Qazaqstanda memlekettik qyzmetkerlerdiń kirisi men shyǵysyn ǵana emes, sonymen qatar olarǵa teńestirilgen kvazımemlekettik sektorda qyzmet isteıtin basqarýshylardyń da kirisi men shyǵystaryn mindetti deklaratsııalaý engiziledi», - dedi ol búgin QR «Atameken» UKP otyrysynda.
Onyń sózine qaraǵanda, 2018 jyldan bastap, kiris pen shyǵys deklaratsııalarynyń sáıkestiligi tekserile bastaıdy.
«Osylaısha, ıeligindegi jeke múlki, kiristeri men shyǵystary, aktıvteri arasyndaǵy aqparattardy salystyra otyryp, ashyqtyq qamtamasyz etiledi. Sonymen birge, 2020 jyldan bastap, barshaǵa birdeı deklaratsııalaý mindeti engiziledi. Olardyń qataryna «A» korpýsy, memlekettik-saıası qyzmetkerler, depýtattar, sýdıalar men kvazımemlekettik sektorda basqarýshy fýnktsııalardy atqarýshy qyzmetkerler ózderine qatysty aqparatty deklaratsııalarda jarııalaýy tıis bolady», - dedi A.Shpekbaev.
Bunyń aldynda habarlanǵandaı, Qazaqstanda deklaratsııany 2017 jyly - 2 mln adam, 2020 - 12 mln adam tapsyratyn bolady.
