2017 jyly Qazaqstan men Qytaıdyń taýar aınalymy 30%-ke artty
ASTANA. QazAqparat - Astanada QR Premer-Mınıstriniń birinshi orynbasary Asqar Mamın men QHR Memlekettik keńesi Premeriniń orynbasary Chjan Gaolıdiń tóraǵalyǵymen Yntymaqtastyq jónindegi Qazaqstan-Qytaı komıtetiniń 8-otyrysy ótti, dep habarlaıdy QazAqparat.
«Bizdiń Memleket basshylarymyzdyń bastamasymen Qazaqstan-Qytaı memleketteriniń birlesken ındýstrıaldyq-ınnovatsııalyq yntymaqtastyq baǵdarlamasy qabyldandy. Onyń aıasynda jalpy quny 27 mıllıard AQSh dollaryn quraıtyn 51 joba qolǵa alynyp otyr», - dep atap ótti Asqar Mamın atalmysh jıynda.
Vıtse-premerdiń sózinshe, qytaılyq kompanııalar birlesken jobalarǵa belsendi atsalysýda.
«Byltyr Qazaqstan Prezıdentiniń QHR-ǵa resmı sapary barysynda «Nurly jol» jańa ekonomıkalyq saıasaty men Jibek jolynyń Ekonomıkalyq beldeýi baǵdarlamasyn úndestirý josparyna qol qoıylǵan bolatyn. Jospar úlken kóliktik-tranzıttik, ınvestıtsııalyq damýdyń joldaryn ashyp otyr. Biz qazir sol jumystyń nátıjelerin kóre bastadyq. 2017 jyldyń eki aıynda bizdiń elder arasyndaǵy taýar aınalymy 30%-ke artty. Bul óte úlken kórsetkish. «Qytaı-Qazaqstan-Eýropa» baǵytyndaǵy konteınerlik tasymal jyl saıyn eki esege ósip keledi. 2017 jyldyń eki aıynda byltyrǵy jyldyń alǵashqy aıymen salystyrǵanda, ósim 2,6 ese bolǵan. Bul «Bir jol - bir beldeý» jáne «Nurly jol» baǵdarlamalarynyń is júzinde júzege asyp jatqandyǵyn bildiredi», - dedi A. Mamın.
Taraptar otyrys barysynda ekijaqty yntymaqtastyq máseleleriniń keń aýqymyn, atap aıtqanda saýda-ekonomıkalyq, energetıkalyq, ındýstrııalyq, ınnovatsııalyq, mádenı-gýmanıtarlyq salalardaǵy ózara is-qımyl, shekara mańy jáne óńirlik seriktestikti damytý, kólik-logıstıkalyq, aýyl sharýashylyǵy, ǵylymı-tehnıkalyq salalardaǵy yntymyqtastyq máselelerin talqylady. 
«Nurly jol», «Jibek jolynyń ekonomıkalyq beldeýi» sekildi iri kólemdi baǵdarlamalardy iske asyrýdyń birlesken jumysy, sondaı-aq kólik jáne logıstıka salasynda jańa ónimder men qyzmet túrlerin qurý jaıttary pysyqtaldy.
Otyrys barysynda «Qostanaı-Astana» telekópiri arqyly «Saryarqa Avto Prom» JShS-nyń ANKAI atty avtobýstardyń birlesken óndirisi iske qosyldy.
Jıyn sońynda Yntymaqtastyq jónindegi Qazaqstan-Qytaı komıtetiniń 8-otyrysynyń hattamasyna qol qoıyldy.
