2017 jyly Qazaqstan astyǵy men eti qaı elderge jóneltiledi
"Biz 2021 jylǵa deıin sıyr eti kólemin arttyra otyryp, kelesi jyly EAEO elderine - 30 myń tonna, Qytaıǵa - 40 myń tonna iriqara etin baǵyttamaqpyz. Astyq syndy suranysy joǵary taýarlardy EAEO elderine - 479 myń tonna, TMD memleketterine - 2,5 mln. tonna, Qytaıǵa - 1 mıllıon tonna, Aýǵanstanǵa - 86 myń tonna, Iranǵa - 900 myń tonna jáne ózge de elderge - 370 myń tonna eksporttalady dep kútilýde", - dep atap ótti búgin Ortalyq kommýnıkatsııalar qyzmetinde QR Aýyl sharýashylyǵy vıtse-mınıstri Gúlmıra Isaeva.
Bunyń aldynda xabarlaǵanymyzdaı, Qazaqstanda agroónerkásiptik keshenniń eksporttaý ortalyǵy qurylady. Ortalyqtyń mindetine aýyl sharýashylyǵy taýarlaryn óndirýshilerdi servıstik jáne qarjylyq qoldaý men olarǵa arnalǵan eksporttyq arnalar enetin bolady.
Ortalyq satyp alýshylardy izdeý, ónimdi jetkizý boıynsha saýda jelilerimen kelisimshart jasaýmen aınalysady. Budan basqa, ortalyq eksporttyq arnalar ashý maqsatynda taýarlar toptamasyn qalyptastyrý úshin ónimdi satyp alýdy júzege asyrýy múmkin. Sondaı-aq, memlekettik baǵdarlama aıasynda eksporttaý ortalyǵy saýdalyq qarjylandyrý, eksporttyq kelisimsharttardy saqtandyrý, ilgeriletý men logıstıkaǵa arnalǵan eksporttyq granttardy usynatyn bolady.