2017 jyly halyqtan qansha qarý satyp alyndy
ASTANA. QazAqparat - QR Іshki ister mınıstrligi 2017 jyldyń sáýir-jeltoqsan aılary aralyǵynda halyqtyń qolyndaǵy zańsyz qarý-jaraqty, oq-dáriler men jarylǵysh zattardy satyp alý aktsııasyn ótkizgen bolatyn. Atalǵan aktsııa nátıjesin QR ІІM Memlekettik til jáne aqparat departamentiniń dırektory Almas Sadýbaev Feısbýktegi paraqshasynda jarııa etti, dep habarlaıdy QazAqparat.
«Shara nátıjesinde ishki ister organdaryna 2,1 myń azamat júginip, olar óz erikterimen 3 myńǵa jýyq atys qarýyn, 60 myńnan astam oq-dári men 14 keli jarylǵysh zattardy tapsyrdy. Halyqtan qarý-jaraqtardy satyp alý sharasy 2012 jyldan beri júrgizilip keledi. Sharanyń tıimdiligine sońǵy 5 jylda atys qarýyn qoldaný arqyly jasalatyn qymlystardyń 55 paıyzǵa tómendeýi dálel bola alady», - dedi Almas Sadýbaev.
Sonymen qatar ol azamattardyń qarý-jaraqty, oq-dáriler men jarylǵysh zattardy óz erikterimen qaıtarymsyz negizde tapsyrý tártibi Іshki ister mınıstrliginiń resmı saıtynda ornalasqanyn atap ótken.
