2017 jyly elordanyń turǵyn úı naryǵy qalaı qubylady
Aǵymdaǵy jyly teńge baǵamynyń nyǵaıa túsýiniń ózi jyljymaıtyn múlik naryǵynyń qaıta jandanýy múmkin degen boljam jasaýǵa túrtki bola almaq emes. Saraptamalyq qyzmetterdiń basym bóliginiń málimetterinshe, Qazaqstannyń barlyq qalalary men oblystaryna qaraǵanda osy jylǵy satyp alý-satý mámileleriniń basym bóligi Astana qalasynda tirkelgen. Elordada baspana satyp alýdyń artýyna ne túrtki, jalpy bıyl turǵyn úı baǵasy qalaı bolmaq?
Astanada páter satyp alý-satý mámileleriniń arta túsýine munaıdyń álemdik baǵasy men eldegi qarjylyq jaǵdaıdyń turaqtylyǵynan bólek, maýsym men qyrkúıek aılarynda ótetin EKSPO-2017 kórmesi de sebep bolyp otyrǵany anyq jaıt.
«Qazaqstandyq memlekettik-jekeshelik áriptestik ortalyǵy» AQ sarapshylarynyń aıtýynsha, halyqaralyq kórme qarsańynda jańa salynǵan baspana baǵasynyń óse túsetindigi sózsiz. Degenmen baǵa ósimi shamamen 7-10 paıyz tóńireginde ǵana bolmaq. Kerisinshe, ekinshi naryqtaǵy jyljymaıtyn múlik baǵasy tómendeı túsetin bolady. Al EKSPO kórmesi aıaqtalǵannan keıin turǵyn úı naryǵyndaǵy basy arty páterlerdiń óte kóp bolýyna baılanysty baspana baǵasy quldyraýy múmkin.
Qazaqstannyń jyljymaıtyn múlik federatsııasynyń sarapshylary da aldaǵy ýaqytta turǵyn úı baǵasynyń tómendeıtindigin boljaǵanymen páter quny onyń qala aýmaǵynda ornalasqan ornyna baılanysty aýytqyp turatyndyǵyn alǵa tartýda. Olardyń paıymynsha, 2017 jyldyń ortasyna deıin bastapqy naryqtaǵy páter baǵasy shamamen 25, al ekinshi naryqtaǵylar tipti 40 paıyzǵa deıin quldyraýy yqtımal.
QR Rıeltorlar qaýymdastyǵynyń prezıdenti Nına Lýkıanenko ekinshi naryqtaǵy baspana baǵasynyń tómendeýine negizgi sebepterdiń biri «Nurly jer» baǵdarlamasynyń júzege asyrylýy jáne aldaǵy ýaqytta mindetti túrde paıda bolatyn qoljetimdi baǵadaǵy jańa qurylys nysandary dep sanaıdy.
«Bankter men developerler arasynda jańa birlesken jobalardyń paıda bolýyn kútemin. Bul satyp alýshylardyń páterli bolýyna kómektesetin jańa ónim ázirleýge múmkindi beredi. Máselen, nesıe teńgemen jylyna 2,12 paıyz bolýy múmkin. «Nurly jol» baǵdarlamasy men qoljetimdi baǵaǵa salynatyn jańa qurylys nysandary ekinshi naryqtaǵy baǵaǵa áser etedi. Sondyqtan satýshylar páterdi ótkizý úshin óte aıtarlyqtaı arzandatýy múmkin», - dedi Lýkıanenko.
Biraq, turǵyn úı baǵasynyń tómendeýine bankterdiń nemese memlekettik baǵdarlamalardyń áleýetti satyp alýshylar úshin barynsha tıimdi usynystarynan týyndaıtyn básekelestik qana emes.
Homsters.kz jyljymaıtyn múlik onlaın-servısiniń basqarýshy seriktesi M.Renniń paıymynsha, baspana qurylysynyń kúrt nasharlaı bastaýy da onyń qunynyń tómendeýine túrtki bolyp otyr.
«Ekinshi naryqtaǵy baspanalardyń sapasynyń nasharlaı bastaýyna, tozý deńgeıiniń joǵary bolýyna oraı qyzyǵýshylyq kemı túsedi. Bul satýshylardyń tábetin tartyp, óz nysandaryn satý barysynda birshama jeńildik jasaýyna sebep bolady. Búgingi kúni mundaı jeńildik bastapqy jarııa etilgen baǵanyń 10-15 paıyzyna deıin jetýi múmkin», - dedi Ren.
Aıta keterligi, Statıstıka komıtetiniń málimetterinshe, Astanada jańa salynǵan páterlerdiń 1 sharshy metr shamamen 340 myń teńgeni quraıdy. Al ekinshi naryqtaǵy baspana quny bolsa sharshy metrine 313 myń teńge tóńireginde bolyp otyr.
Demek, sarapshylardyń boljamynsha, aǵymdaǵy jyly elordada jańa salynǵan páterlerdiń quny birshama kóterilip, al ekinshi naryqtaǵy baspana baǵasy birshama tómendeıtin bolady.
