2017 jyly elordada tótenshe jaǵdaıdan kelgen shyǵyn 64 mln teńge boldy
ASTANA. QazAqparat - 2017 jyly elordada tótenshe jaǵdaılardan kelgen shyǵyn 64 mln teńge boldy. Bul týraly búgin Astana qalalyq tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Meırambek Qaısanov aıtty, dep habarlaıdy QazAqparat.
«Ótken kezeńde elorda aýmaǵynda 75 tótenshe jaǵdaı oryn aldy. Bul tótenshe jaǵdaıdyń 2,6 paıyzǵa tómendegenin kórsetedi. Tótenshe jaǵdaılarda 27 adam qaza tapty, shyǵyn 64 mln 387 myń teńgeni qurady», - dedi ol.
Onyń dereginshe, 2017 jylǵy 12 aıda bólimshelermen 5720 shuǵyl shyǵýlar iske asyrylyp, 466 adam qutqaryldy, 1370 adam qaýipsiz jerge kóshirildi.
«Jyl ishinde elordada 699 órt boldy, órtte 11 adam qaza tapty, olardyń 3-eýi - balalar. Sondaı-aq kólik quraldarynda 161 órt tirkeldi. Turǵyn úı sektorynda ǵana 377 órt oryn aldy, bul 2016 jylmen salystyrǵanda 8,2 paıyzǵa tómen», - dedi departament bastyǵynyń orynbasary.
Qaısanovtyń aıtýynsha, 2017 jyly departamenttiń ınjenerlik-ınspektorlyq quramy órt qaýipsizdigin qamtamasyz etý maqsatynda 1330 tekseris júrgizgen.
«683 tekseristiń nátıjesinde órt qaýipsizdigi salasyndaǵy 5328 buzýshylyqtar anyqtaldy. 716 kináli tulǵa ákimshilik jaýapkershilikke tartyldy. Onyń ishinde 81 eskertý jasalyp, 24 mln 788 myń 825 teńge kólemindegi 635 aıyppul salyndy. Berilgen uıǵarymnyń oryndalmaýyna baılanysty ákimshilik sot sheshimimen 56 nysannyń 139 kúnge qyzmeti toqtatyldy jáne 29 mln 655 myń 830 teńgege 109 aıyppul belgilendi», - dedi ol.
