2017 jyly Deklaratsııalaý júıesine halyqtyń neǵurlym daıyn bóligi tartylady - Qarjy mınıstri
ASTANA. QazAqparat - 2017 jyl jalpyǵa birdeı Deklaratsııalaý júıesine halyqtyń neǵurlym daıyndalǵan bóligin tartý boljanady. Bul týraly búgin Senattyń jalpy otyrysynda QR Qarjy mınıstri Baqyt Sultanov málim etti.
Mınıstr «Qazaqstan Respýblıkasynyń keıbir zańnamalyq aktilerine jeke tulǵalardyń kiristeri men múlkin deklaratsııalaý máseleleri boıynsha ózgerister men tolyqtyrýlar engizý týraly» zań jobasy jóninde baıandama jasaǵan bolatyn.
«Jalpyǵa birdeı deklaratsııalaýǵa kóshý sońǵy ýaqytta qoǵamda qyzý talqylanyp keledi. Kóptegen damyǵan elder jeke tulǵalardy derbes deklaratsııalaý júıesin salyqtardyń tolyq tólenýin qamtamasyz etý jáne kóleńkeli ekonomıkaǵa qarsy is-qımylǵa arnalǵan tıimdi qural retinde baǵalaıdy.Sondyqtan da búgingi zań jobasy Elbasynyń osy baǵyttaǵy tapsyrmasyn júzege asyrý úshin jáne Qazaqstanda jalpyǵa birdeı deklaratsııalaýdy engizý úshin zańnama negizin quraıdy», - dedi Qarjy mınıstri. Onyń aıtýyna qaraǵanda, zań jobasynyń negizgi bóligi jeke tulǵalardyń deklaratsııa toltyrý jáne ony tapsyrý rásimderin reglamentteýge arnalǵan. Atap aıtqanda, deklaratsııa tapsyrýǵa mindetti bolatyn tulǵalar dál anyqtalady. Sonymen qatar, deklaratsııalardyń nysandary, olardy toltyrý qaǵıdalary men tabys etý merzimderi aıqyndalady.
«Bul rette azamattardyń Deklaratsııalaý júıesine «kirýi» kezeń-kezeńmen júzege asyrylýy usynylady. Máselen, 2017 jyly Deklaratsııalaý júıesine halyqtyń neǵurlym daıyndalǵan bóligin tartý boljanady. Bul depýtattar, sýdıalar, memlekettik qyzmetshiler, sondaı-aq olardyń jubaılary. Sonymen qatar, birinshi kezeńde, ilki joba retinde ulttyq kompanııalardyń ákimshilik personalyn jáne memlekettik kásiporyndardyń qyzmetkerlerin deklaratsııalaý júıesine kirgizý usynylady. Al jalpyǵa birdeı deklaratsııalaýdyń ekinshi kezeńi 2020 jylǵa qaraı josparlanyp, oǵan halyqtyń qalǵan bóligin tartý kózdelgen», - dedi B. Sultanov.
Onyń aıtýynsha, Deklaratsııalaý júıesiniń ózi eki túrli deklaratsııa usynýdy kózdeıdi. Onyń birinshisi - bir ret qana tapsyrylatyn «kiris» deklaratsııasy ári bul «aktıvter jáne mindettemeler týraly deklaratsııa» dep atalady. Onda jeke tulǵalar kirgen jylynyń basynda elimizde jáne sheteldegi jınaqtalǵan qarajaty jáne múlki týraly málimetterin kórsetedi, sondaı-aq óziniń basqa adamdarǵa qaryzdaryn jáne eger bar bolsa, kerisinshe, basqa adamdardyń ózine qaryzdaryn kórsetedi.
«Ekinshi qujat «jeke tulǵalardyń tabysy jáne múlki týraly deklaratsııa» dep atalady jáne ol jyl saıyn tapsyrylady. Onda bir jyl ishinde alǵan tabysy, memlekettik tirkelýge tıisti, satyp alynǵan jáne satqan múlki týraly málimet kórsetiledi. Budan basqa, sybaılas jemqorlyqqa qarsy zańnama sýbektileri bolyp tabylatyn memlekettik qyzmetshiler, depýtattar, sottar jáne basqa adamdar kezekti deklaratsııada joǵaryda kórsetilgen múlikterdi satyp alǵan shyǵystarynyń kózderin kórsetýge tıis bolady», - dedi mınıstr B. Sultanov.
