2017 jyly bazalyq zeınetaqy taǵaıyndaý tártibi ózgeredi - S. Jaqypova
ASTANA. QazAqparat - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Qujat Qazaqstandaǵy zeınetaqy júıesin odan ári jaǵyrtýdyń 2030 jylǵa deıingi tujyrymdamasyn iske asyrý bolyp tabylady. Zań jobasy Qazaqstan Respýblıkasynyń zeınetaqy júıesin jańǵyrtýdy kózdeıdi, ol zeınetkerlik jasta laıyqty ómir súrý deńgeıi úshin zeınetaqy tólemderiniń barabarlyǵyn qamtamasyz etýge múmkindik beredi.
Qujatpen tanystyrǵan Densaýlyq saqtaý jáne áleýmettik damý vıtse-mınıstri Svetlana Jaqypovanyń aıtýynsha, zeınetaqy júıesin jańǵyrtýǵa baılanysty 2016 jyldyń 1 qańtarynan bastap áleýetti qurylymdar qyzmetkerleriniń zeınetaqysyn reformalaý, 2017 jyldyn 1 shildesinen bastap bazalyq zeınetaqy taǵa ıyndaý tártibin ózgertý, 2018 jyldyń 1 qańtarynan bastap jumys berýshiniń qarajaty esebinen qosymsha 5 paıyzdyq jarnalaryn engizý kózdeledi.
«Qoldanystaǵy jınaqtaýshy zeınetaqy júıesin jumys berýshilerdiń jarnalary esebinen qyzmetkerlerdiń tabysynan 5 % mólsherinde qalyptasatyn jańa shartty-jınaqtaýshy quramdaýyshymen tolyqtyrýdy kózdeıdi. Zeınetaqymen qamsyzdandyrýdyń barabarlyǵyn saqtap qalý úshin 2018 jyldan bastap zeınetaqy júıesiniń jańa shartty-jınaqtaýshy quramdaýyshyn engizý usynylady», - dedi Densaýlyq saqtaý jáne áleýmettik damý vıtse-mınıstri Svetlana Jaqypova.
Jańa júıe zeınetaqymen qamsyzdandyrýdyń jınaqtaýshy, sol sııaqty taratýshy qaǵıdattaryn qoldaıdy. «BJZQ» AQ-da ashylǵan shartty zeınetaqy shottaryna jumys berýshiler paıdasyna olardyń tabystarynan mindetti 5 %-dyq zeınetaqy jarnalaryn aýdaratyn qyzmetkerler zeınetaqy júıesiniń qatysýshylary bolyp tabylady.
Qyzmetker zeınetkerlik jasqa jetken jáne qatysý ótili bes jyldan kem bolmaǵan jaǵdaıda shartty-jınaqtaýshy quramdaýyshynan beriletin zeınetaqy mólsheri shartty zeınetaqy shotynda qalyptasqan zeınetaqy mindettemelerine jáne kútiletin ómir súrý uzaqtyǵyna baılanysty aıqyndalatyn bolady.
