2017 jyly Astanada eki zamanaýı kolledj salynady
ASTANA. QazAqparat - 2017 jyly Astanada eki birdeı zamanaýı kolledj salý josparlanǵan. Bul týraly búgin Astana qalalyq máslıhatynyń 40-sessııasynda qalalyq bilim bóliminiń basshysy Elmıra Sýhanberdıeva aıtty.
«2017 jylǵa qaraı 1200 oryndyq tehnıkalyq kolledj ben 800 orynǵa arnalǵan, 300 oryndyq jataqhanasy bar qurylys kolledjin salý josparlanǵan. Sonymen qatar, 2015 jylǵa deıin Qazaq tehnologııa jáne bıznes ýnıversıteti kolledjiniń jańa ǵımaraty paıdalanýǵa berilmek. Sondaı-aq, Ońtústik koreıalyq kompanııalarmen birlesken ІT-tehnologııalar kolledjiniń de qurylysy júrip jatyr», - dep atap ótti E.Sýhanberdıeva. Onyń aıtýynsha, munyń barlyǵy elorda jastaryn jańa zamanaýı standarttar boıynsha tehnıkalyq jáne kásibı bilimmen qamtamasyz etýge septigin tıgizedi. «Astanadaǵy 4 memlekettik jáne 2 jekemenshik kolledjder bazasynda álemdik deńgeıdegi kolledjder salý josparyn esepke alǵanda, olardyń syıymdylyǵy 20 840 orynnan 32 000 orynǵa deıin kóbeıedi», - dedi Bilim basqarmasynyń basshysy. Qalalyq bilim basqarmasynyń málimetteri boıynsha, búginde Astanada 34 kolledj jumys istep tur, olardyń 12-si memlekettik, 22-si jekemenshik. Qazirgi kolledjerdiń 16 jataqhanasy bar, olardyń 8-i jekemenshik kolledjderge tıesili. «Degenmen, áli 2 300 stýdent jataqhanaǵa muqtaj», - dep atap ótti E.Sýhanberdıeva. Aıta keteıik, búgingi tańda Astana kolledjderinde 29 859 adam 66 mamandyq jáne 113 kvalıfıkatsııa boıynsha bilim alyp jatyr. «Jyl saıynǵy bilim berý tapsyrysynyń 10 paıyzǵa ósip otyrýynyń arqasynda 2009 jylmen salystyrǵanda tehnıkalyq jáne tehnologııalyq mamandyqtar boıynsha bilim alyp jatqan stýdentterdiń jalpy sany 15 paıyzǵa artty. Jyl saıyn túlekterdiń jumysqa ornalasý kórsetkishi de jaqsaryp keledi. Máselen, 2012 jyly bul kórsetkish 68 paıyz bolsa, 2014 jyly 74 paıyzǵa jetti», - dep atap ótti Bilim basqarmasynyń basshysy.
