2017 jyly Almaty oblysynda bolǵan ushaq apatynyń sebepteri anyqtaldy
NUR-SULTAN. QazAqparat - QR IIDM 2017 jyly 10 tamyzda Almaty oblysynda tirkeý nómiri UP-LA231 Tecnam-P2002-JF áýe kemesiniń apatqa ushyraýyna qatysty tergeýdiń aıaqtalǵanyn jarııa etti, dep habarlaıdy QazAqparat tilshisi.
«Komıssııa kelesideı qorytyndyǵa kelip otyr: adam ómirin jalmaǵan áýe apaty kezinde ushaq qatty jelge tap bolǵan. Munyń arty ushý kezindegi aıqyn qaýip-qaterdi týyndatqan. Aqyry, ekıpaj bul kedergini eńsere almady. Sońǵy ushý kezinde - bıikke kóteriler ýaqytta qozǵaltqyshtyń qýaty ýaqytsha báseńdep qalǵan», - deıdi QR IIDM áýe apattary men oqıǵalardy tergeý basqarmasynyń basshysy Nurlan Jumasultanov.
Basqarma basshysynyń aıtýynsha, joǵaryda atalǵan sebeppen qatar avıatsııalyq oqıǵanyń mańyzdy qosalqy sebebiniń biri - bıikke ushý barysynda qozǵaltqyshtyń ýaqytsha qýatyn joǵaltyp alýy.
«Ózge de qosalqy sebepter: osy avıatsııalyq oqıǵany tergep-tekserý barysynda «Training Senter Part-FCL» JShS AOB jumysynda kemshilikter anyqtaldy, derekterdi burmalaý men sáıkessizdikter de belgili boldy. Máselen, ushaqtar «Azem» aerodromynan ushyrylyp júrgen. Alaıda qujat boıynsha ol jerden ushaqtardy ushyrýǵa ruqsat berilmegen. Taýly órlerdiń jel baǵytynyń ózgerýine yqpal ete alatyndaı oı-qyry bar. Bul jaǵdaıda ushaq údeýshi jelge tap bolyp, jyldam bıikke samǵaı bastaǵan. Aqyry, jelge tap bolǵan. Mundaı qalyptan tys jaǵdaıda ekıpaj basqarý tetigin ózine tartqan. Aqyry, munyń arty jaısyz boldy. Osynyń saldarynan janar-jaǵarmaıly áýe qozǵaltqyshy ýaqytsha buzylǵan. Uşaqtyń jyldamdyǵy baıaýlap, qozǵaltqyshtyń qýattylyǵy báseńdegennen keıin ushaq jerge qulaǵan», - deıdi spıker.
Eske sala ketsek, 2017 jyldyń 10 tamyzynda «Azem» aerodromynda Tecnam-P2002-JF áýe kemesi apatqa ushyrap, pılot, nusqaýshy men kýrsant qaıtys bolǵan edi.
